Мадриднинг “Реал” клуби ҳужумчиси Килиан Мбаппе Клублар ўртасидаги Жаҳон чемпионати чорак финал босқичидаги “Боруссия Дортмунд”га қарши ўйинда (3:2) киритган голи билан клуб тарихида илгари ҳеч бир футболчи эриша олмаган рекордни янгилади. Бу ҳақда Stats Foot нашрига таяниб Championat хабар берди.
Манбага кўра, франциялик ҳужумчи бир мавсум ичида “Реал” сафида еттита турли турнирда иштирок этиб, уларнинг барчасида гол урган илк футболчига айланди. Ҳозирга қадар “қироллик клуби”нинг ҳеч қандай аъзоси бундай натижага эриша олмаган эди.
Мбаппе статистикаси қуйидагича:
- Ла Лига — 31 гол
- УЕФА Чемпионлар Лигаси — 7 гол
- Испания Кубоги — 2 гол
- Испания Суперкубоги — 1 гол,
- УЕФА Суперкубоги — 1 гол,
- Клублар ўртасидаги Жаҳон чемпионати — 1 гол,
- Қитъалараро кубок — 1 гол.
Маълумот учун, жорий мавсумда Мбаппе жами 58 ўйинда майдонга тушиб, 44 та гол муаллифига айланган.
Эслатиб ўтамиз, Килиан Мбаппе соғлиғи билан боғлиқ муаммолар туфайли 2025 йилги Клублар ўртасидаги Жаҳон чемпионатининг гуруҳ босқичида майдонга туша олмаган эди. Турнир ярим финалида “Реал Мадрид” ҳужумчининг собиқ клуби — Парижнинг “ПСЖ” жамоасига қарши баҳс олиб боради. Баҳс 9 июлдан 10 июлга ўтар кечаси Ўзбекистон вақти билан 00:00 да старт олади.
Изоҳ (0)