Саккиз карра “Олтин тўп” соҳиби, аргентиналик ҳужумчи Лионель Месси ҳамда унинг Интер Майами”даги жамоадоши Луис Суарес ўзларининг шахсий футбол клубини ташкил этди. Бу ҳақда ESPN нашри хабар берди.
Янги жамоа “Депортиво ЛСМ” деб номланди ва Уругвай футболининг тўртинчи дивизионидан иштирокини бошлайди. “ЛСМ” қисқартмаси икки футболчи исмларининг бош ҳарфларидан ташкил топган, яъни Луис Суарес ҳамда Лионель Месси исмларининг қисқартирма шакли ҳисобланади.
Мени шерик сифатида танлаганингдан жуда хурсандман. Умид қиламанки, бу лойиҳани ривожлантиришда бор кучим билан ёрдам бераман, энг асосийси — сен билан узоқ вақт яна биргамиз, деди Месси.
Мессининг бу лойиҳадаги роли ҳозирча аниқ эмас, бироқ маҳаллий ОАВ хабарига кўра, у клубда шерик сифатида фаолият юритади. Шунингдек, Уругвай терма жамоаси ва “Интер” (Милан) собиқ футболчиси Альваро Рекоба янги жамоа бош мураббийи бўлиши кутилмоқда.
Клуб эълон қилиниши билан унинг Instagram саҳифаси ҳам очилди ва орадан атиги икки соат ўтиб, саҳифада 40 мингдан ортиқ обуначи тўпланди.
“Депортиво ЛСМ”нинг ўқув-машғулот базаси уругвайлик ҳужумчига тегишли спорт мажмуаси ҳудудида жойлашади. Бу ерда 1400 томошабинга мўлжалланган сунъий қопламали стадион ва 620 ўринли мини-футбол майдони мавжуд.
Эслатиб ўтамиз, Месси 2023 йилдан бери “Интер Майами” сафида тўп суради, Суарес эса 2024 йилда бу клубга қўшилган.
Изоҳ (0)