Аргентиналик иқтидорли вингер Матиас Соулэ январда кетишни режалаштирганди. “Рома”да унинг ишлари ўхшамади. Клаудио Ранери жамоа билан кўпроқ машғулот ўтказгани учун Томмазо Балданси афзалроқ эканлигини очиқчасига айтди. Шунингдек, Ранери Матиаснинг ҳам фикрини ўзгартирди: у қолди ва баҳорда А Сериянинг энг яхшиларидан бирига айланди.
Клаудио бутун “Рома” билан худди шундай ишни қилди. У келишидан олдин римликлар қуйи лигага тушиб кетмаслик ҳақида ўйларди. Сўнгги тур олдидан эса Чемпионлар Лигаси учун кураш олиб борилди.
Ранери сувни шаробга айлантирмайди. Лекин бундан озгина осони ҳам унинг қўлидан келадигандек. Биз унинг ҳар қандай вазиятни тубдан ўзгартира олишига етарлича баҳо бермаётганга ўхшаймиз.
Элдор Шомуродов — ҳам шахсий, ҳам жамоавий даражада бу ўзгаришнинг бир қисми ҳисобланади. Шунингдек, у Ўзбекистон терма жамоасининг тарихда биринчи марта Жаҳон Чемпионатига чиқишига катта ёрдам берди. У нафақат клуб, балки терма жамоа сафида ҳам ажойиб голлар урмоқда.
“Рома”нинг Моуриньо билан ҳамкорлиги Элдорнинг Италиядаги фаолиятини деярли барбод қилганди
Элдор Италияга пандемиядан кейин борган. У 25 ёшга тўлди, Россияда ўзини яхши кўрсатди ва Ўрта Осиёнинг жуда истиқболли бозорини эканлигини исботлади. “Женоа” анча пул тўлади. Клуб тарихида фақат бир хорижлик форвард ундан қимматроқ эди — Диего Милито.
Шомуродов ҳали Горан Пандевни енга олмаган Маттиа Дестро, Жанлука Скамакка билан жамоага тушиб қолди. Ва йўқолиб қолмади. Ҳужумчидан меҳнат қилиш, тўпга ўйнаш ва кўп югуриш талаб қилинадиган ўйинларда у энг яхшилардан бири бўлиб чиқди. Элдор дебют мавсумида саккизта гол урди. Рақобат ва клуб мақомини ҳисобга олсак, жуда яхши натижа эди.
Унга фақат Генуядагина қойил қолишмади. 2021 йилнинг ёзида Шомуродов “Рома”га ўтди. Эдин Жеко кетди, лекин Моуриньо келди — мураббийга қулоқ соладиган ва қаттиқ меҳнатдан қўрқмайдиган ҳужумчи керак эди. Трансфер қиймати 20 миллион эди. Элдор ҳаммасига тайёр эди.
Орадан икки ҳафта ўтиб, ”Рома” Темми Абраҳам учун 41 миллион тўлади. Ўзбекистонлик футболчининг карьерасида яна ўзгариш бўлди. У Жозе ажратган дақиқалардан жуда унумли фойдаланди (биринчи мавсумида асосий таркибда тушган бешта ўйинида 3+4 натижа), лекин барибир захирада қоларди. Иккинчи йили Элдор деярли ўйнамади. Ундан ҳам ёмони: қишда “Специя”га кўчиб ўтиб,кўзга ташланмай қўйди. Генуяда порлаган тиришқоқлик ва самарадорликни уйғунлаштирган жонкуяр энди йўқдек туюларди.
Энди бу тарих. Шомуродов Ўзбекистон терма жамоаси билан мундиалга йўл олди, Рим жамоасининг бир қисмига айланди ва ниҳоят нима юз бергани ҳақида гапирди.
Унинг Corriere dello Sport нашрига берган интервьюсидан парча: “Мен “Рома”га келганимда ягона ҳужумчи эдим ва асосий таркибдан мунтазам жой оламан деб ўйлагандим, аммо кейин Абраҳамнинг трансфери ҳамда унга тикилган пуллар ҳақида хабарлар тарқалди. Мен бунга ишонгим келмасди. Менга нисбатан адолатсизлик қилингандек туюлди, тушкунликка тушдим. Ўзимга ишониш ўрнига, бошқаларни айбладим. Охир-оқибат, мен ҳаракат қилишни тўхтатдим — бу эса таназзулга олиб келди”.
Шомуродов ўзгара олди ва Ранерининг “Рома”сида муҳим футболчилардан бирига айланди
У ерда яна бир гап бор: “Ҳозир мен ўзимни бошқа футболчидек ҳис қиляпман. Ранери мени ҳаётга қайтарди”.
Элдор Клаудио билан икки йил олдин — “Кальяри”да ижарада бўлганида учрашган. Мураббий унга дарҳол ишонч билдирган. Шомуродов биринчи турданоқ майдонга тушганди. Ҳаммаси ҳам яхши кетмади, жароҳат халақит қилди, аммо ҳужумчи формасини тиклади ва баҳорда яна А Серияда гол ура бошлади.
Ўтган ёзда у Римга қайтди. Даниэле де Росси уни сўнгги дақиқаларда майдонга туширарди. Иван Юрич эса камроқ ишонарди. Аммо хорват тез орада жамоани тарк этди ва “Рома”га Ранери келди. Бир ойдан сўнг жамоа мағлуб бўлишни тўхтатди. Айнан ўша пайтларда Шомуродов мунтазам равишда захирадан майдонга туша бошлади.
Баҳорга келиб у тактик деталнинг алмаштириб бўлмайдиган қисмига айланди. Ранери унинг ижрочилигидан ўйин давомида рақибнинг заиф томонларига босим ўтказиш ва уни соддалаштириш учун фойдаланган. Элдор картинага керакли штрихларни киритганди.
Масалан. “Верона” билан ўйинда ўзбекистонлик футболчи марказий ҳимоя чизиғининг латерал ва чекка қисмлари ўртасида — мураббий заиф деб ҳисоблаган зона орқали кириб борди. Рим дербисида Артём Довбикка жуда яқин жойлашди — “Лацио” шундоққина дарвоза олдига “ётиб олди”, аммо икки баланд бўйли ҳужумчи рақибнинг ёпиқ вазиятига эътибор қаратди. “Ювентус”га қарши ўйинда у 3-4-3 ни 4-4-2 га айлантирди ва марказий ҳимоячиларга босимни оширди; кейинчалик, юриш иш берганда ва “Рома” ўйинни тенглаштирганда, Ранери паст блокка қайтди ва Элдорни ўрта чизиққа туширди — у яна уддалади.
Бунинг устига, Шомуродов ҳар бир дақиқадан максимал даражада фойдаланди: “Ювентус”га қарши ўйинда ҳисобни тенглаштирди, “Монса”га қарши ўйинда 1+1 ни амалга оширди, “Атлетик”ни мағлуб этди. “Элдор биз учун нима қилгани ва нима бераётгани билан фундаментал аҳамиятга эга, — деди мураббий. — У соатига 100 мил тезликда ҳаракатланиб, борини беради. У олтинга ўхшайди, мен уни жуда ҳурмат қиламан”.
Элдор мавсумни “Рома”нинг асосий ҳужумчиси сифатида якунлади
Шомуродов қанчалик фойдали футболчи эканлигини яхшироқ тасаввур қилишингиз учун мана бу маълумотни келтирамиз: Довбик билан илк дақиқалардан бирга ўйнай оласизми, деган савол апрель ойидаги матбуот анжуманларида одатий ҳолга айланди. Италиялик журналистлар бундай ўйинчини захира ўриндиғида қолишини тасаввурига сиғдиришмас эди. Уни илк дақиқалардаёқ майдонда кўришни исташарди.
Ниҳоят Ранери сукутни бузди ва фикр билдирди: “Йўл-йўлакай пайдо бўлиб, Шомуродов ўйинни бузади. Агар у бошидан ўйнаса-ю, лекин худди шундай ҳисса қўшмаса, менда ўқ узиш учун патрон қолмайди”.
Аммо кўп ўтмай баҳслар тугади. Шомуродов сўнгги олти турни асосий таркибда ўтказди. Бу ҳам оддий ўйинлар эмасди. “Рома” гарчи ўша пайтда орзу амалга ошмайдигандек туюлган бўлса-да, ҳамон Чемпионлар Лигасига чиқиш ҳақида ўйларди.
Миланнинг икки жамоаси, “Фиорентина” ва “Аталанта” каби жамоаларга қарши мураккаб ўйинларга яқинлашдик. Ранери Элдорни асосий таркибда туширяптими, демак, шу вариантни маъқул кўрган. Ҳатто, уни жойлаштириш учун схемани ўзгартирган: иккита баланд бўйли ҳужумчи билан ўйнашга ўтди.
“Рома”га якунда бир очко етмай қолганига Шомуродовнинг айби йўқлиги аниқ. Ушбу мураккаб ўйинларнинг дастлабкиси, “Верона”га қарши баҳсда ўз ҳисобига гол ёздириб қўйди. Иккинчисида, “Интер”га қарши баҳсда эса голли узатмани амалга оширди. “Фиорентина”га қарши ўйинда ҳам голга ҳаммуаллифлик қилди.
2025 йилда Элдор барча турнирларда 5+4 натижа қайд этди (мавсумда эса 7+6) — ҳар 131 дақиқада самарали ҳаракат қилди. Бир вақтнинг ўзида у прессинг самарадорлиги бўйича А Сериянинг энг яхши ҳужумчилари қаторига кирди ва тўққизликлар орасида асосий ёрдамчилар тўртлигига кирди. Фақат Ромелу Лукаку, Матео Ретеги ва Никола Крстовичлар ундан олдинда. Қайд этиб ўтиш керак, юқоридаги уч ҳужумчи майдонда Элдордан кўра кўпроқ дақиқаларга эга бўлган.
Римдаги фаолиятини Жозега унчалик керак бўлмаган ҳужумчи сифатида бошлаган Элдор Шомуродов ҳозирга келиб, “Рома”нинг асосий футболчиларидан бирига айланди.
***
Шу билан бирга, Элдор Ўзбекистон терма жамоасига катта ёрдам берди ва жамоа тарихда биринчи марта мундиалга йўл олди! Табиийки, Шомуродов бунда муҳим роллардан бирини бажарди.
Албатта, Ўзбекистон терма жамоаси ЖЧ—2026 да каттароқ мақсадларни олдига қўйгани аниқ. Бу йўлда эса Элдорга Аббосбек Файзуллаев, Абдуқодир Ҳусанов ва бошқа футболчилар ёрдам беради.
Изоҳ (0)