Клублар ўртасидаги Жаҳон чемпионати 2-тур учрашувида Англиянинг “Манчестер Сити” клуби Бирлашган Араб Амирликларининг “Ал-Айн” жамоасига қарши майдонга тушди. Пеп Гвардиола шогирдлари рақиб дарвозасига жавобсиз 6 та гол уриб, йирик ҳисобдаги ғалабани қўлга киритди.
Ҳисоб 8-дақиқада очилди — Илкай Гундўған аниқ зарбаси билан жамоасини олдинга олиб чиқди. 27-дақиқада эса аргентиналик Клаудио Эчеверри ҳисобни 2:0 кўринишига келтириб қўйди. Тайм сўнггида Эрлинг Ҳоланд пенальтидан гол уриб, танаффусга “шаҳарликлар”ни 3:0 ҳисобида олиб чиқди.
Иккинчи бўлимда ҳам “Сити” устунликни давом эттирди. 73-дақиқада Гундўған ўзининг дублини нишонлади, 84-дақиқада эса Оскар Бобб ҳам ўз номини таблога ёздириб қўйди. Якуний гол 89-дақиқада Райан Шерки томонидан киритилди — 6:0.
Ушбу ғалаба эвазига “Манчестер Сити” 2 та ўйиндан кейин 6 очко тўплаб, плей-офф босқичига йўл олди. “Ал-Айн” ҳисобида эса ҳали очко мавжуд эмас.
Ўзбекистонлик ҳимоячи Абдуқодир Ҳусанов ўйинни асосий таркибда бошлади. Футболчи 58-дақиқада сариқ карточка олган бўлса, 61-дақиқада ўз жойини Оскар Боббга бўшатиб берди.
Клублар ўртасидаги Жаҳон чемпионати — 2-тур
23 июнь, душанба
“Манчестер Сити” — “Ал-Айн” 6:0
Голлар: 1:0 — Гундўған (8), 2:0 — Эчеверри (27), 3:0 — Ҳоланд (45+5, пен), 4:0 — Гундўған (73), 5:0 — Бобб (84), 6:0 — Шерки (89).
Изоҳ (0)