Англиянинг “Манчестер Сити” клуби бош мураббийи Хосеп Гвардиола янги мавсум олдидан жамоа таркибини қисқартириш ниятида эканини маълум қилди.
Испаниялик мутахассис “Ал-Айн”га қарши ўйиндан олдин ўтказилган матбуот анжуманида захирада кўп футболчини ушлаб туришни истамаслигини айтди:
“Мен ҳозирги таркибдаги футболчиларни бутун мавсум давомида сақлаб қолишни истардим. Улар билан боғлиқ ҳеч қандай шикоятим йўқ — ўзини тутиши, муносабати жуда яхши. Аммо менга захирада олти-етти футболчи керак эмас. Улар ўйин амалиётисиз тушкунликка тушади. Мен бундай ҳолатни истамайман. Шу боис баъзи футболчилар жамоадан кетади.” — деди Гвардиола.
Маълумот учун, айни пайтда “Манчестер Сити” Клублар ўртасидаги Жаҳон чемпионатида иштирок этмоқда. Жамоа биринчи турда Марокашнинг “Видад” клубига қарши баҳс олиб бориб, 2:0 ҳисобида ғалаба қозонди.
“Шаҳарликлар” иккинчи тур учрашувини эртага, 23 июнь тонгида БААнинг “Ал-Айн” жамоасига қарши ўтказади. Баҳс Ўзбекистон вақти билан соат 6:00 да бошланиши режалаштирилган.
Изоҳ (0)