Toyota компанияси жорий йилнинг кузида якунланиши кутилаётган тарихий воқеа — Wоven City (“Тўқилган шаҳар”) лойиҳасини ишга туширишга тайёрланмоқда. Бу дунёдаги биринчи “ақлли” шаҳар бўлиб, унда роботлар, сунъий интеллект ва автоном транспорт воситалари кундалик ҳаётда фаол иштирок этади.
Бошланиши 2020 йилда эълон қилинган ушбу лойиҳа ниҳоят ҳаётга татбиқ этилмоқда. Токио шаҳридан 140 километр узоқликдаги Сидзука префектурасида, илгари Хигаши-Фудзи заводи жойлашган ҳудудда алоҳида шаҳарча барпо этилди. Лойиҳанинг асосий мақсади келажак технологияларини реал ҳаёт шароитида синовдан ўтказиш.
Шаҳарнинг дастлабки аҳолиси Toyota компанияси ходимлари ва уларнинг оила аъзоларидан иборат 100 киши бўлади. Яқин йилларда бу рақам 360 нафарга етказилади, узоқ муддатли режаларда эса аҳоли сони 2000 кишигача оширилади.
Wоven City ҳақида
Шаҳарда 2020 йилги Олимпиада учун ишлаб чиқилган e-Palette номли ҳайдовчисиз электромобиллар ҳаракатланади. Йўллар уч турга бўлинади: пиёдалар учун, велосипедлар учун ва роботаксилар учун алоҳида ҳаракат йўлаклари.
Барча бинолар замонавий сенсорлар билан жиҳозланган. Энергия манбайи сифатида водород ёнилғи элементлари ва қуёш панелларидан фойдаланилади. Шаҳарда сувни қайта ишлаш тизими ҳамда чиқиндини бошқаришнинг илғор технологиялари йўлга қўйилади. Уй-рўзғор ишлари учун робот ёрдамчилари жалб этилади, сунъий интеллект эса аҳолининг соғлиғини назорат қилади, энергия истеъмолини бошқаради ва ҳатто ерости туннел тизими орқали юк етказиб бериш билан шуғулланади.
Ҳар бир бино, кўча ва хизматлар ягона тармоққа уланади. Бу эса тўлиқ маълумотлар тўпламини йиғиш, келажакдаги шаҳар инфратузилмаси моделлари устида ишлаш ва замонавий технологияларни бевосита реал муҳитда синовдан ўтказиш имконини беради.
Бундан ташқари, Woven City сунъий интеллект, робототехника ва рақамли технологиялар тажрибадан ўтказиладиган шаҳар сифатида яратилган. Унда олимлар, муҳандислар ва оддий аҳолининг ҳаёти ўзаро уйғунлаштирилган. Toyota бу лойиҳани юритиш учун махсус Woven Planet номли шўба компания ташкил этган бўлиб, “wоven” атамаси ҳам айнан шу умумий интеграция ва ҳамкорлик фалсафасини ифодалайди.
“Биз ҳаётни қулайроқ ва экологик тоза қилишга хизмат қиладиган технологиялар шаҳри яратмоқдамиз. Woven City— бу келажакда бутун дунё бўйлаб мегалополис тушунчасини ўзгартириши мумкин бўлган инновациялар учун синов майдончасидир”, деди Toyota компанияси раиси Акио Тоэда.
Ҳозирча шаҳар сайёҳлар учун ёпиқ, бироқ Toyota 2026 йилда уни ташриф буюрувчилар учун очишни режалаштирган. Ҳозирда эса бутун дунё робот шаҳар ҳаётини қизиқиш билан кузатмоқда.
Изоҳ (0)