Берлинда “Аёлларнинг жамиятдаги роли: Ўзбекистон-Германия тадбиркор аёллари анжумани” ўтказилди

Берлин шаҳрида расмий ташриф билан бўлиб турган Ўзбекистон делегацияси Ўзбекистоннинг Германиядаги элчихонаси ташаббуси билан ташкил этилган “Аёлларнинг жамиятдаги роли: Ўзбекистон-Германия тадбиркор аёллари анжумани”да иштирок этди.

Сўнгги йилларда Ўзбекистонда аёл тадбиркорларни қўллаб-қувватлашга алоҳида эътибор қаратилмоқда. Улар учун , имтиёзли кредитлар ва махсус ўқув дастурлари, бир сўз билан айтганда, кенг имкониятлар яратилган. Мазкур анжуманда Ўзбекистоннинг Германиядаги элчиси Дилшод Ахатов, Президент Админстрацияси масъул ходими, Савдо-саноат палатаси қошидаги тадбиркор аёллар Кенгаши раиси Нозима Давлетова, “Микрокредитбанк” АТБ Бошқарув раиси ўринбосари Шахло Ибрагимова қатнашди.

Шу билан бирга, “Ҳамроҳ” хотин-қизлар тадбиркорлигини қўллаб-қувватлаш компанияси раҳбари Дилфуза Нурматова, Берлин федерал ўлкаси Ички ишлар ва спорт сенатори Ирис Шпрангер, “Sparkassenstiftung фор International Cooperation” ташкилотининг Европа ва Марказий Осиё бўйича директори Матиас Фос, икки мамлакатнинг фаол тадбиркор аёллари ҳамда Германияда истиқомат қилаётган ватандошлар ҳам иштирок этди. 

Анжуманда қуйидаги мавзуларда қизғин муҳокамалар олиб борилди:

• “Sparkassenstiftung фор International Cooperation” ташкилотининг Ўзбекистондаги фаолияти ва лойиҳалари;
• Ўзбек хотин-қизларининг тадбиркорлик ташаббусларини молиявий қўллаб-қувватлаш;
• Аёлларга кўмак ва маслаҳат бериш тизимлари;
• “СЕС” ташкилотининг аёл тадбиркорларни қўллаб-қувватлашдаги роли;
• Маданият ва иқтисодиёт орқали аёллар фаоллигини ошириш;
• Аёл олималарнинг халқаро ҳамкорликдаги иштироки;
• Ўзбекистонлик ҳунармандлар маҳсулотларини Германия бозорига чиқариш йўллари.

Анжуманда Микрокредитбанк мижози бўлган тадбиркор аёлларнинг чиқишлари алоҳида эътироф этилди. Икки мамлакат тадбиркор аёллари ўртасида ўзаро ҳамкорликни янги босқичга олиб чиқиш, тажриба алмашиш ва янги қўшма лойиҳаларни амалга ошириш борасида келишувларга эришилди. 

Тадбир якунида Микрокредитбанк, “Sparkassenstiftung фор International Cooperation” ҳамда “Ҳамроҳ” компанияси ўртасида ҳамкорлик меморандуми имзоланди. 

Шунингдек, икки давлат тадбиркорларининг ўзаро саёҳатларини ташкил этиш, онлайн форумлар ва маҳсулотлар алмашинуви каби қўшма дастурларни амалга оширишга келишиб олинди. 

Реклама ҳуқуқи асосида