Ғарб давлатлари россиялик ишбилармонларга Украинани тиклаш учун пул ўтказиш орқали «санкцияларни тўлаш» имкониятини беришни муҳокама қилмоқда. Бу ҳақда манбаларига таяниб, Associated Press хабар берди. Манбаларнинг айтишича, бу таклиф Канада молия вазири ўринбосари Христиа Фриланд томонидан у ўз ғоясини «рус олигархлари» билан муҳокама қилганидан сўнг илгари сурилган.
АПънинг ёзишича, мазкур таклиф G7 мамлакатлари молия вазирларининг ўтган ҳафта Германияда бўлиб ўтган йиғилишида эълон қилинган. Христиа Фриланд ёшлигида Financial Times газетасининг Москвадаги бюроси бошлиғи бўлиб ишлаган ва бунинг шарофати билан у «баъзи рус олигархлари билан таниш», деб таъкидлайди нашр. Гап айнан кимлар ҳақида кетаётгани очиқланмаган.
Исмини ошкор этмаган манбанинг АП агентлигига айтишича, бу ташаббус аллақачон Украина томони билан ҳам муҳокама қилинган. «Ҳозирча бу шунчаки ғоя, аммо Ғарб давлатлари бунга қизиқиш билдирмоқда», — деди агентлик суҳбатдоши.
Ишбилармонлар Россия ҳарбийларининг Украинага бостириб киришига жавобан жорий қилинган санкциялар остида. Санкциялар доирасида Европа Иттифоқи россияликларнинг 10 миллиард евролик активларини музлатиб қўйган. Бу суммага музлатилган кўчмас мулк, қимматли қоғозлар, яхталар ва автомобиллар қиймати киради. ЕИ, шунингдек, Россия Федерацияси Марказий банкининг 23 миллиард евролик активларини музлатиб қўйган. Европа дипломатияси раҳбари Жозеп Боррел бу активларни Украина фойдасига йўналтиришни таклиф қилганди. АҚШ Конгресси эса Россиянинг мусодара қилинган активларини Украина фойдасига йўналтириш тўғрисидаги қонун лойиҳасини маъқуллаган.
Изоҳ (0)