Bentley компанияси Майамида ўзининг биринчи Bentley Residenceс осмонўпар турар жой биносини қуради. 200 та квартирадан иборат мажмуа Атлантика океани қирғоғидаги Санни-Айлс-Бич шаҳрида пайдо бўлади, деб ёзади Motor.
Bentley — ўзини кўчмас мулк соҳасида синаб кўришни истаган биринчи ишлаб чиқарувчи эмас, олдинроқ Aston Martin шу каби ташаббус билан чиққан. Компаниянинг ҳатто бир нечта қизиқарли лойиҳалари бор: бу Майамидаги Aston Martin Residences минораси, Манхэттендаги 130 Williamтурар жой мажмуаси ва ундан икки соатли йўл узоқлигидаги Sklvan Rock мажмуаси. Bentley эса Dezer Development қурилиш компанияси ва Sieger Suarez Architects архитектура студияси билан ҳамкорликда 60 қаватли осмонўпарни қуриш ниятида.
Бинонинг дизайн-лойиҳаси маҳаллий Florida Green Building Council (FLGC) табиатни қўриқлаш ташкилоти билан келишиб олинган. Қурилишда фақат экологик хавфсиз материаллардан фойдаланилади, қирилиб кетиш хавфи остида бўлган денгиз тошбақаларини ҳимоя қилиш мақсадида ҳаддан ортиқ ёритиш тизимидан воз кечилади ва осмонўпар бино электр энергиясини кам сарфлайдиган ҳолда лойиҳаланади.
Bentley Residences’да панорама ойналар билан жиҳозланган 200 та хонадон бўлади. Ҳар бир хона алоҳида терасса, бассейн, сауна ва кўча душига эга бўлади. Энг муҳими — бу бир неча автомобилга мўлжалланган гараж ва уларни кўтаришга хизмат қиладиган патентланган лифт. Шунингдек, квартира харидорлари ихтиёрида машғулотлар зали, кинотеатр, спа-марказ, виски-бар ва ресторан ҳам бўлади. Буларнинг барчасига бонус сифатида океаннинг ажойиб кўринишдан баҳраманд бўлиш мумкин.
Bentley Residences қурилиши 2023 йилда бошланади. Якунланиш муддати — 2026 йил. Квартиралар нархи номаълум, бироқ Aston Martin Residences минорасидаги хонадонлар нархи 600 мингдан 50 миллион долларгача.
Аввалроқ Сингапурда 42 минг уйга мўлжалланган экошаҳар қурилиши ва илк уйлар 2023 йилдан фойдаланишга топширилиши кутилаётгани тўғрисида хабар берилганди.
Мавзуга доир: Германияда автомобиллар киритилмайдиган шаҳар қурилади
Изоҳ (0)