Жиззахда қарийб 1 млрд сўмлик қалбаки пулларнинг муомалага киритилишининг олди олинди. Бу ҳақда ЎзА хабар бермоқда.
Ҳуқуқни муҳофаза қилувчи органлар томонидан ўтказилган тезкор тадбирда Фарғона вилоятида яшовчи, 1980, 1983 ва 1989 йилларда туғилган 3 нафар фуқаро ўзаро тил бириктириб, қалбаки 998 миллион 740 минг сўм пулни Жиззах вилоятида 27 200 АҚШ долларига сотаётган вақтида ашёвий далиллар билан ушланган.
Терговга қадар текширув давомида мазкур шахслардан олинган 200, 100 ва 20 минг сўмлик купюралар кўринишидаги қалбаки банкнотлар пуркагичли принтер ёрдамида чоп этилгани маълум бўлди.
Қонунбузарларнинг икки нафари муқаддам судланган шахслар ҳисобланади.
Ҳозирда уларга нисбатан Жиноят кодексининг 176-моддаси 3-қисми “а” банди (жуда кўп миқдорда қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, қамоққа олиш тарзидаги эҳтиёт чораси қўлланилган.
Бундан ҳуқуқбузарлик содир қилганлар учун кодексда 10 йилдан 15 йилгача озодликдан маҳрум қилиш жазоси белгиланган.
Изоҳ (0)