Самарқанд ва Тошкент шаҳарларида алкоголь ва тамаки маҳсулотларини ноқонуний муомалага киритилишининг олди олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Департаментнинг Самарқанд шаҳар бўлими томонидан ўтказилган тезкор тадбирда “Ш.п.” МЧЖ раҳбари М.Ж. ва дўкон сотувчиси Р.Ж. ҳеч қандай ҳужжатсиз умумий баҳоси 45,6 млн сўм бўлган 38 турдаги алкоголь ва 2 001 қути тамаки маҳсулотларини қонунга хилоф равишда сотувга қўйганликлари аниқланиб, ушбу маҳсулотлар ашёвий далил сифатида олинган.
Шу каби, Департаментнинг Юнусобод туман бўлими томонидан ўтказилган тезкор тадбирда қонунга хилоф равишда тамаки маҳсулотлари савдоси билан шуғулланиб келган А.С. (муқаддам судланган) харидорга “Эссе чанге” номли акциз маркасиз тамаки маҳсулотини сотган вақтида ушланиб, унинг ёнидан сотиш мақсадида сақлаб келинган умумий баҳоси 40,2 млн сўмлик 102 турдаги жами 1 251 қути акциз маркасиз тамаки маҳсулотлари ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)