Самарқанд туманида истеъмолга яроқсиз алкоголь маҳсулотларини сотувга қўйган дўкон фош этилди, деб хабар беради Бош прокуратура ҳузуридаги департамент.
Қайд этилишича, департамент, ДХХ ва ИИВнинг Самарқанд вилояти бошқармалари томонидан тезкор тадбир ўтказилган. Тадбирда Самарқанд тумани “Ўзбеккенти” МФЙ ҳудудидаги “Х.С.” оилавий корхонасининг савдо дўконида ҳеч қандай ҳужжатсиз умумий қиймати 403 миллион сўмлик 49 турдаги жами 11 054 дона, шундан 5 230 донаси қалбаки акциз маркали алкоголь маҳсулотлари сотувга қўйилганлиги аниқланиб, ушбу маҳсулотлар ашёвий далил сифатида олинган.
Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Қорақалпоғистон Республикаси ва Фарғона вилоятида қалбаки акциз маркали алкоголь маҳсулотларини муомалага киритилишининг олди олингани тўғрисида хабар берилганди.
Изоҳ (0)