Тошкент шаҳрининг Шайхонтоҳур ва Хоразм вилоятининг Хива туманида акциз маркасиз тамаки ва истеъмолга яроқсиз алкоголь маҳсулотларини сотаётган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, департаментнинг Шайхонтоҳур туман бўлими томонидан ўтказилган тезкор тадбирда қонунга хилоф равишда тамаки маҳсулотлари савдоси билан шуғулланиб келган Ж.И. харидорга 1 қути акциз маркасиз тамаки маҳсулотини сотган вақтида ушланиб, унинг ёнидан сотиш мақсадида олиб келинган умумий баҳоси 64,6 млн сўм бўлган, жами 3 385 қути хорижда ишлаб чиқарилган акциз маркасиз тамаки маҳсулотлари ашёвий далил сифатида олинган.
Шу каби департаментнинг Хива туман бўлими томонидан алкоголь ва тамаки маҳсулотларини ноқонуний муомалага киритилишининг олдини олиш юзасидан ўтказилган тезкор-қидирув тадбирида тумандаги Гандимён диёри кўчасида жойлашган савдо дўконида 257 дона қалбаки акциз маркали алкоголь маҳсулотлари сотувга қўйилганлиги аниқланиб, ушбу маҳсулотлар ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)