Тўртта ҳудудда қалбаки акциз маркали алкоголь ва тамаки маҳсулотларини муомалага киритилишининг олди олинди

Ургут, Қўшкўпир, Янгиҳаёт ҳамда Наманган туманларида қалбаки акциз маркали алкоголь ва тамаки маҳсулотларини муомалага киритилишининг олди олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, департаментнинг Ургут туман бўлими томонидан ўтказилган тезкор тадбирда “Ҳ.О.” МЧЖга қарашли савдо дўкони раҳбари С.B. ҳеч қандай ҳужжатсиз жами 80 дона “Водка русская” номли қалбаки акциз маркали алкоголь маҳсулотини фуқаро А.А.га 1,6 млн сўмга сотган вақтида ушланиб, ушбу дўкондан умумий қиймати 123 млн сўмлик қалбаки акциз маркали 26 турдаги жами 4 425 дона алкоголь ҳамда 12 турдаги 166 қути тамаки маҳсулоти ашёвий далил сифатида олинган.

Шу каби департаментнинг Қўшкўпир туман бўлими томонидан ўтказилган тезкор тадбирда “А.Д.” МЧЖ раҳбари Х.С. Урганч шаҳридаги савдо шохобчасида ҳеч қандай ҳужжатсиз умумий қиймати 71,6 млн сўмлик 97 турдаги жами 150 та қалбаки акциз маркали алкоголь маҳсулотини сотувга қўйганлиги аниқланиб, ушбу маҳсулотлар ашёвий далил сифатида олинган. 

Департаментнинг Янгиҳаёт туман бўлими томонидан ўтказилган тезкор тадбирда “Навқирон” МФЙ ҳудудида тамаки маҳсулотлари савдоси билан шуғулланиб келган К.Э. ва С.Д. харидор А.З.га Eссе Change номли акциз маркасиз тамаки маҳсулотини сотган вақтларида ушланиб, уларнинг ёнидан 141 турдаги 905 қути акциз маркасиз тамаки маҳсулоти ашёвий далил сифатида олинган. 

Департаментнинг Наманган туман бўлими томонидан ўтказилган тезкор тадбирда “М.2.” МЧЖга тегишли савдо дўкони сотувчиси А.К. ҳеч қандай ҳужжатсиз 5 дона қалбаки акциз маркали алкоголь маҳсулотини фуқаро А.Б.га сотган вақтида ушланиб, ушбу дўкондан 19 турдаги жами 269 дона қалбаки акциз маркали алкоголь маҳсулоти ашёвий далил сифатида олинган. 

Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.