Наманган вилояти Поп туманида ўтказилган тезкор тадбир давомида қалбаки АҚШ долларларининг савдосига чек қўйилди. Бу ҳақда вилоят ИИБ ахборот хизмати хабар берди.
Қайд этилишича, Андижон вилояти Шаҳрихон туманида яшовчи муқаддам судланган шахс тадбир иштирокчисига 100 долларлик қалбаки купюрани 50 доллардан ҳисоблаб, жами 2,7 минг доллар миқдоридаги қалбаки пулларни сотган вақтида ашёвий далиллар билан ушланган.
Шундан сўнг, фуқаро келган Cobalt автомашинаси холислар иштирокида кўздан кечирилганда, машина олд эшигининг ён қисмида 100 долларлик купюралардаги жами 1000 доллар, фуқаронинг ёнида эса 200 доллар миқдоридаги пуллар борлиги аниқланиб, текшириб кўриш учун олинган.
Қайд этилишича, текшириб кўриш учун олинган пуллар тайёрлаш услуби типография корхонасида махсус ҳимоя воситасида эмас, балки оддий бошқа дастгоҳда тайёрлангани аниқланган.
Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 2-қисми “а” банди билан жиноят иши қўзғатилиб, айбланувчи қамоққа олинган. Ҳозирда тергов ҳаракатлари олиб борилмоқда.
Бундан олдин Навоий вилояти ИИБ ТҚХ Жиноят қидирув бўлими, ДХХ Навоий вилояти бошқармаси ва департамент ходимлари билан ҳамкорликда ўтказилган тезкор тадбирда жиноий гуруҳ томонидан 400 миллион сўм сохта пуллар 160 миллион сўм ҳақиқий пулларга алмаштирилаётган пайтда қўлга олинганди. Апрель бошларида эса Тошкент шаҳри Янгиҳаёт туманида харидор қалбаки пулга iPhone сотиб олгани, Тошкент вилояти Ангрен шаҳрида қалбаки пуллар муомалага киритилишининг олди олингани тўғрисида хабар берилганди.
Изоҳ (0)