ССВ собиқ раҳбари Анвар Алимов Республика ихтисослаштирилган эндокринология илмий-амалий тиббиёт маркази директори вазифасини бажарувчи этиб тайинланди. Бу ҳақда вазирлик матбуот хизмати хабар берди.
Анвар Алимов 1978 йилда ҳозирги Тошкент педиатрия тиббиёт институтини тамомлаган. Турли йилларда Тошкент врачлар малакасини ошириш институтида декан, Президент девонида консултант, етакчи консултант, Тошкент педиатрия тиббиёт институти ректори, соғлиқни сақлаш вазирининг биринчи ўринбосари, соғлиқни сақлаш вазири (2012—2016 йиллар), Республика ихтисослаштирилган эндокринология илмий-амалий тиббиёт маркази директори каби масъул лавозимларда ишлаган.
Ўзбекистонда хизмат кўрсатган соғлиқни сақлаш ходими, тиббиёт фанлари доктори, профессор Анвар Алимов тайинловга қадар Тошкент шаҳар соғлиқни сақлаш бош бошқармаси бошлиғи сифатида фаолият кўрсатиб келаётган эди.
Ботирбек Исабеков Тошкент шаҳар соғлиқни сақлаш бошқармаси бошлиғи вазифасини бажарувчи этиб тайинланди.
Ботирбек Исабеков 2001 йилда Иккинчи Тошкент давлат тиббиёт институтининг бакалавриат, 2003 йилда Биринчи Тошкент давлат тиббиёт институтининг ординатура босқичларини тамомлаган.
Меҳнат фаолияти давомида Учтепа туманидаги 30-сон оилавий поликлиника ҳамда ушбу туман тиббиёт бирлашмасида бош шифокор муовини, Тошкент шаҳар соғлиқни сақлаш бош бошқармаси бошлиғи ўринбосари, бошлиғи каби масъул лавозимларда ишлаган.
Тайинловга қадар у Тошкент шаҳар соғлиқни сақлаш бош бошқармаси бошлиғининг ўринбосари сифатида фаолият кўрсатиб келаётган эди.
Изоҳ (0)