Ўзбекистон соғлиқни сақлаш вазирининг тегишли буйруғи билан Мурад Қурбонов Қорақалпоғистон соғлиқни сақлаш вазири этиб тайинланди. Бу ҳақда ССВ матбуот хизмати хабар берди.
Мурад Қурбонов бунга қадар Республика ихтисослаштирилган онкология ва радиология илмий-амалий тиббиёт марказининг Қорақалпоғистон филиали директори вазифасида ишлаб келаётган эди.
Тиббиёт фанлари номзоди Мурад Қурбанов, шунингдек, Хўжайли тумани тиббиёт бирлашмаси бош шифокори, Республика онкология диспансери бош шифокори сингари масъул лавозимларда ишлаган.
Эслатиб ўтамиз,Қорақалпоғистон Республикаси Жўқорғи Кенгеси Президиумининг қарори билан Отажон Ҳамроев 2020 йил 13 май куни соғлиқни сақлаш вазири этиб тайинланганди, октябрь охирида эса у эгаллаб турган лавозимидан кетган.
Аввалроқ Ўзбекистон Президентининг фармони билан Абдуҳаким Хожибоев соғлиқни сақлаш вазири этиб тайинлангани тўғрисида хабар берилганди. Хожибоев 2020 йил 15 июль кунидан бери соғлиқни сақлаш вазири биринчи ўринбосари сифатида ишлаётган эди.
2017 йилнинг февралидан буён соғлиқни сақлаш вазири сифатида фаолият юритган Алишер Шодмонов эса Тошкент тиббиёт академияси ректори этиб тайинланган. Республика ихтисослаштирилган эндокринология илмий-амалий тиббиёт маркази директори бўлиб ишлаган Анвар Алимов эса соғлиқни сақлаш вазири ўринбосари — Тошкент шаҳар ССББ бошлиғи этиб тайинланганди.
Изоҳ (0)