Остона ва Олмаота халқаро аэропортларида жамоат саломатлиги соҳасидаги фавқулодда вазиятларда ҳаракат қилиш бўйича ўқув машғулотлари ўтказилди. Бу ҳақда республика Соғлиқни сақлаш вазирлиги хабар берди.
Машғулотлар маймунчечак каби карантин ва ўта хавфли инфекциялар белгиларига эга шахсларни аниқлашга қаратилган. Улар давомида барча асосий хизматлар: санитария-эпидемиология, чегара, божхона, шунингдек, аэропорт хизматлари, ички ишлар бўлими, ҳаво бандаргоҳи тиббиёт пункти ва тиббиёт муассасалари ўртасидаги ҳамкорлик ишлаб чиқилган.
Юқумли касалликка шубҳа қилинган йўловчилар аниқланганда қандай ҳаракатлар қилишга алоҳида эътибор берилган.
“Машғулотлар давомида маймунчечакка чалинган шартли бемор жалб қилинди. Ходимлар йўловчида аломатларни аниқлашдан тортиб, уни шифохонага ётқизиш ва зарур эпидемияга қарши ҳамда дезинфекция тадбирларини ўтказишгача бўлган тўлиқ чора-тадбирларни амалга оширди”, дейилади ССВ хабарида.
Машқлар давомида барча хизматлар юқори даражадаги тайёргарликни синовдан ўтказган, якунида идоралараро ҳамкорликни кучайтириш бўйича тавсиялар берилган.
Изоҳ (0)