Дунё бўйлаб кенг муҳокамаларни келтириб чиқараётган «Плаквенил» (гидроксихлорохин) дори воситаси Ўзбекистон тажрибасига кўра, ўзининг ижобий самарасини кўрсатмоқда. Бемор билан мулоқотда бўлганларга ҳам профилактика сифатида мазкур дори ҳафтасига 2 та таблетка бериляпти. Бу ҳақда 3 август, душанба куни АОКАда ўтказилган матбуот анжуманида маълум қилинди, деб хабар бермоқда «Дарё» мухбири.
Тадбирда Коронавирусга қарши кураш штаби аъзоси Анвар Алимовнинг таъкидлашича, ЖССТ «Плаквенил»нинг коронавирусни даволашдаги таъсирини ўрганиш бўйича бошлаган ишини якунига етказмаган.
«Жаҳон соғлиқни сақлаш ташкилоти «Плаквенил»нинг коронавирусни даволашдаги таъсирини ўрганиш бўйича 26 май куни ишчи гуруҳини ташкил этди. Аммо ўрганиш ишларини охиригача етказмасдан, текширувлар тўхтатилгани тўғрисида 3 июнь куни маълумот берди.
Кейин ЖССТ барча давлатларга Lancet журналида чоп этилган маълумотларни асос сифатида кўриб чиқинглар, деб тавсия берди. Юқорида айтганимдек, ташкилот текширувларни амалга ошириш бўйича ишчи гуруҳ тузди. Бир ҳафтадан сўнг «Биз бу текширувларни тўхтатяпмиз. Натижаси ҳали номаълум, биз бунга яна қайтамиз», дея мавзуни ёпди. Бу «Плаквенил» мавзусининг сиёсий масала эканини кўрсатади», деди Алимов.
ССВ вакили Ҳабибулло Оқиловнинг фикрича, Ўзбекистон ўз тажрибасига асосан, «Плаквенил»дан фойдаланмоқда ва бу самара беряпти.
«ЖССТ топшириқ берадиган ташкилот эмас, у фақат тавсия берувчи ташкилот. Унинг тавсияларини қабул қилиш-қилмаслик ҳар бир давлатнинг ўзига боғлиқ.
Ўзбекистон март ойидан бери шу кунгача коронавирус билан курашиб, бу борада ўз тажрибасига эга бўлди. Шунинг учун биз бошқаларнинг тажрибасига қарамасак ҳам бўлади.
Бизнинг тажрибамизга кўра, «Плаквенил» ишлаяпти, ўз самарасини кўрсатяпти. Даволаш протоколининг 6-версияси – ҳозир амал қилаётган вариантида ҳам «Плаквенил» бор. У фақатгина касалликнинг бошланғич босқичида, яъни биринчи 3-5 кунда берилса, ўз самарасини кўрсатмоқда.
Бундан ташқари, бемор билан мулоқотда бўлганларга профилактика сифатида «Плаквенил»дан ҳафтасига 2 та таблетка бериляпти. Бу ҳам протоколга киритилган. Лекин ҳар битта версияга «Бу вақтинча қабул қилинган қўлланма», деб ёзиб қўйилган. Эртага, индинга, кейинги ҳафтага маълумотлар ўзгарадиган бўлса, бунга яна ўзгартиришлар киритилаверади. Бугунги кунга келиб, бу дори бизда қабул қилинган ва истеъмол қилинмоқда.
Бир неча ҳафта олдин мамлакатимизда 12 минг нафар бемор даволаниб чиққанини ва уларнинг аксарияти «Плаквенил» қабул қилганини айтгандим. Сўнгги статистика бўйича даволаниб чиққан 16 минг 838 нафар беморнинг ҳам кўп қисми «Плаквенил» олган. Чунки шифохоналарда даволанаётганларнинг аксарияти битта схема асосида даволанмоқда ва мана шу ижобий таъсир кўрсатмоқда», деди Оқилов.
Штаб аъзоси «Плаквенил»ни профилактика мақсадида ичиш мумкинлиги ҳамда ушбу дорининг Ўзбекистон тажрибасидаги ижобий таъсирини тасдиқловчи тадқиқотлар ўтказилмаганлигига тўхталаркан, хусусан, шундай деди:
«АҚШ давлат раҳбари, Бразилия президенти Болсонару ҳам коронавирусдан профилактика учун «Плаквенил» ичди.
Америкада коронавирус шифохоналарида ишлаётган ўзбек мутахассислари билан гаплашганимизда, улар ҳам «Плаквенил» бўйича турли ёндашувлар борлигини, аммо шифохонада ишлаётганларнинг ҳаммаси профилактика учун шу дорини ичаётганини айтишди. Шунинг учун ҳам биз уни протоколга киритдик ва касалликка чалинганлар билан биринчи мулоқот қилганларга тавсия этяпмиз.
«Плаквенил»нинг Ўзбекистонда даволаш протоколидан чиқарилиб, кейин яна киритилгани бутун дунёда кузатилмоқда. Lancet журнали шундай ёзгани учун кўпчилик уни протоколдан чиқарди, журнал мақоласини қайтариб олгач, аксарият давлатлар яна уни қўллашга қайтди. Биз ҳам ўз тажрибамизга қайтдик. Бу доридан воз кечганимизда касаллик кўрсаткичлари салбий томонга ўзгарди, буни кўрдик.
Ҳозир бу дорининг тажрибамиздаги таъсирини тадқиқот қилишга вақт ҳам, эҳтиёж ҳам йўқ. 16 минг 300 нафардан зиёд тузалиб чиққан беморларнинг касаллик тарихи бор. Улар архивда камида 25 йил туради. Улар асосида кўп тадқиқотлар қилинади, унда хулосалар чиқарилишига аминман», деди Ҳабибилло Оқилов.
Изоҳ (0)