Польша полицияси пул ундириш мақсадида мигрантларни ўғирлашда гумон қилинган халқаро гуруҳни фош қилди. Тўда таркибидаги тўрт нафар украиналик қўлга олинди. Бу ҳақда Польшанинг RMF FM нашри хабар берди.
Халқаро жиноий тўда Польша ва Латвия ҳудудида фаолият юритган. Жиноятчилар одамларни ўғирлаб, чегарадан ноқонуний равишда олиб ўтган ва уларнинг оилаларидан пул талаб қилган.
Қўлга олинганлар тўрт нафар Украина фуқароси бўлиб, улар Польшада қонуний равишда бўлган. Уларнинг энг каттаси 40 ёшда, энг кичиги эса 20 ёшда. Июнь ойи ўрталарида Польша Марказий тергов бюроси Эфиопиянинг икки фуқароси ўғирлаб кетилгани ҳақида маълумот олган. Гуманитар ташкилотлардан бирининг вакиллари интернет орқали шундай хабар олганини айтган.
Инглиз тилида ёзилган хабарга кўра, Польшада криптовалюталар талаб қилаётган тўда томонидан одамлар ўғирланган. Жиноятчилар қурбонларни ўлдириш ва уларнинг аъзоларини сотиш билан таҳдид қилган. Хабарда яланғоч боғланган эркакларнинг фотосуратлари бўлган.
Латвияда эса тўда аъзолари уч малиликни ўғирлаб кетгани аниқланган. Эркакларни боғлаб, юкхонага қамаб қўйишган. Улардан бирини дарахтга боғлаб, ёғоч таёқ билан қаттиқ калтаклашган. Қийноқ видеоси унинг оиласига пул тўлаш талаби билан юборилган.
Польша полицияси шов-шувли ишни текшириш учун Латвия, Литва ва Эстония хизматлари билан ҳамкорликни йўлга қўйган. Ўғриларнинг шахси аниқланган. Июнь ойи охирида ўғрилар тўдасидан уч кишини Польшада қўлга олишга муваффақ бўлган. Жиноий тўданинг айрим аъзолари ҳали ҳам озодликда юрибди.
Изоҳ (0)