Тошкент шаҳрида Миллий гврадия ходимлари Анҳорда чўкаётган фуқарони қутқариб қолди. Бу ҳақда пойтахт ФВБ хабар берди.
Унга кўра, 17 июнь куни Шайхонтоҳур тумани “Анҳор Локоматив” боғи ҳудудидан оқиб ўтувчи Анҳор каналида бир фуқаро чўкаётган бўлган. Ушбу ҳудудда хизмат олиб бораётган Миллий гвардия ҳарбий хизматчилари — оддий аскар Юлдошев.О ҳамда оддий аскар Валиев.Б томонидан кўрилган тезкор ҳаракатлар натижасида фуқаронинг ҳаёти сақлаб қолинди.
Ушбу ҳарбий хизматчиларнинг мазкур фидокорона хизмати эътиборга олиниб, фавқулодда вазиятлар вазири номидан рағбатлантирилди.
5 июнь куни Фарғона вилояти Олтиариқ туманида уч нафар вояга етмаган бола сунъий сув ҳавзасига чўкиб кетган эди. Ҳозирда прокуратура томонидан терговга қадар текшириш ҳаракатлари олиб борилмоқда.
Май ойининг бошларида эса Тошкентнинг Бўрижар каналига тушиб кетган қизларни қутқарган эркакнинг ўзи ҳалок бўлганди. Давлат раҳбари марҳумнинг рафиқаси ва фарзандларига ҳамдардлик билдирди ва марҳум Абдуманноп Самиқов “Жасорат” медали билан мукофотланди. Мукофот унинг оила аъзоларига топширилди. Марҳумнинг турмуш ўртоғига моддий ёрдам тариқасида 50 млн сўм топширилди.
Айни пайда Фавқулодда вазиятлар вазирлиги томонидан ёз мавсумида сувда чўкиш ҳолатларининг олдини олиш мақсадида кенг кўламли профилактик тадбирлар олиб борилмоқда. Тегишли мутахассислар иштирокида ўтказилган ўрганишлар натижасида республика бўйлаб 2 004 та чўмилиш тақиқланган сув объектлари аниқланиб, улар рўйхатга олиниб, назоратга олинган.
Қибрайда ФВВ қутқарувчилари томонидан каналга тушиб кетган фуқаро қутқарилганди.
Изоҳ (0)