Исроил бош вазир Биньямин Нетаньяху Эрон ядро қуролига эгалик қилиши “оқибати”дан огоҳлантирди. Бу ҳақда The Jerusalem Post хабар берди.
Нетаньяхунинг сўзларига кўра, “Ҳизбуллоҳ” қулаганидан сўнг, Эрон ислом инқилоби қўриқчилари корпуси бойитилган уранни ядро қуролига айлантириш ҳаракатини тезлаштирган.
Биз буни кўрдик. Улар бир йил ичида ядровий бомбага эга бўлади ва ундан фойдаланади. Бошқа ядровий давлатлардан фарқли ўлароқ, улар ҳақиқатан ҳам ундан фойдаланади ва бизни йўқ қилади, деди Исроил бош вазири.
У ҲАМАС томонидан Ғазода гаровга ушлаб турилганлар масаласига ҳам тўхталди.
Биз уларга зарар етказмаслик учун қўлимиздан келганини қиляпмиз. Исроил тинч аҳолининг қурбон бўлишидан сақланиш учун қўлидан келган ҳамма нарсани қилмоқда, ҲАМАС эса бунинг акси учун барча куч-ғайратини сарфламоқда, дея даъво қилди Нетаньяху.
Маълумот учун, Исроил бош вазири 1995 йилдан буён Эрон “тез орада ядро қуролига эга чиқиши” ҳақида гапириб келади. АҚШ разведкаси ва Халқаро атом энергияси агентлиги (МАГАТЭ) Эрон ядро қуролини яратаётганига оид далиллар топмаган.
Биз сиёсий таҳлилчилар ёки давлат амалдорлари эмасмиз. Шунинг учун ядро қуроли яратиш бўйича фаол дастур мавжудлигини эълон қилиш учун бизга аниқ далиллар керак, биз эса бундайларни кўрмадик, деган эди МАГАТЭ раҳбари Гросси.
Эроннинг ядровий объектларига ҳужум
Исроил 13 июндан бошлаб Эронга тинимсиз ҳужум қилиб, унинг ядровий объектлари, мудофаа тизимлари, юқори мартабали ҳарбий амалдорлари ва ядрочи олимларини нишонга олди. Ҳужумлар оқибатида камида 627 киши, жумладан, кўплаб тинч аҳоли вакиллари ҳалок бўлди, деб хабар берди Эрон Соғлиқни сақлаш вазирлиги.
22 июнь куни АҚШ Исроилнинг ҳаракатларига қўшилиб, учта асосий объектга — Фордо, Натанз ва Исфаҳонга авиазарбалар берди. Ҳужумда бункер бомбалардан ҳам фойдаланилди. Марказий разведка бошқармаси бошлиғи Жон Ретклифф операция Эрон ядровий дастурига жиддий зарар етказганини маълум қилди. Зарбалардан кўп ўтмай АҚШ президенти Дональд Трамп Эрон ва Исроил ўртасида ўт очишни тўхтатиш режими кучга кирганини эълон қилди, буни иккала томон ҳам тасдиқлади.
Изоҳ (0)