Ўзбекистон терма жамоаси ва Қаршининг “Насаф” клуби футболчиси Акмал Мозговой фаолиятини Бирлашган Араб Амирликларининг “Банияс” клубида давом эттириши мумкин. Футболчига яқин манбанинг “Дарё”га маълум қилишича, ҳозирда музокаралар давом этмоқда.
Унга кўра, ярим ҳимоячи Абу-Даби клубига ўтишга розилик билдирган. “Банияс” раҳбарияти ҳозирда “Насаф” билан музокаралар олиб бормоқда ва яқин кунларда трансфер расман эълон қилиниши кутилмоқда.
Маълумот учун, “Банияс” ўтган мавсум Бирлашган Араб Амирликлари Пролигасида 12-ўринни эгаллаган. Клубда фаолият юритаётган футболчиларнинг умумий қиймати 5,6 миллион еврони ташкил қилади. Жамоадаги энг қиммат футболчи Мали терма жамоаси аъзоси Юсуф Ниакате бўлиб, унинг қиймати 1,5 миллион еврога тенг.
Акмал Мозговой “Насаф” тарбияланувчиси ҳисобланади. У 2018 йилдан бери Қарши клубининг асосий жамоаси шарафини ҳимоя қилиб келмоқда. “Аждарлар” сафида умумий 223 та учрашувда майдонга тушиб, 21 та гол ва 15 та ассист муаллифига айланган. Transfermarkt портали футболчининг қийматини 1,5 миллион еврога баҳоламоқда.
Мозговой 2020 йилдан бери Ўзбекистон терма жамоаси сафида ўйнамоқда. Ҳозиргача у терма жамоа либосида 15 та учрашувда майдонга тушган.
Изоҳ (0)