O‘zbekiston terma jamoasi va Qarshining “Nasaf” klubi futbolchisi Akmal Mozgovoy faoliyatini Birlashgan Arab Amirliklarining “Baniyas” klubida davom ettirishi mumkin. Futbolchiga yaqin manbaning “Daryo”ga ma’lum qilishicha, hozirda muzokaralar davom etmoqda.
Unga ko‘ra, yarim himoyachi Abu-Dabi klubiga o‘tishga rozilik bildirgan. “Baniyas” rahbariyati hozirda “Nasaf” bilan muzokaralar olib bormoqda va yaqin kunlarda transfer rasman e’lon qilinishi kutilmoqda.
Ma’lumot uchun, “Baniyas” o‘tgan mavsum Birlashgan Arab Amirliklari Proligasida 12-o‘rinni egallagan. Klubda faoliyat yuritayotgan futbolchilarning umumiy qiymati 5,6 million yevroni tashkil qiladi. Jamoadagi eng qimmat futbolchi Mali terma jamoasi a’zosi Yusuf Niakate bo‘lib, uning qiymati 1,5 million yevroga teng.
Akmal Mozgovoy “Nasaf” tarbiyalanuvchisi hisoblanadi. U 2018-yildan beri Qarshi klubining asosiy jamoasi sharafini himoya qilib kelmoqda. “Ajdarlar” safida umumiy 223 ta uchrashuvda maydonga tushib, 21 ta gol va 15 ta assist muallifiga aylangan. Transfermarkt portali futbolchining qiymatini 1,5 million yevroga baholamoqda.
Mozgovoy 2020-yildan beri O‘zbekiston terma jamoasi safida o‘ynamoqda. Hozirgacha u terma jamoa libosida 15 ta uchrashuvda maydonga tushgan.
Izoh (0)