Футбол бўйича Ўзбекистон Кубогининг 3-туридан ўрин олган учрашувлар 13 май, сешанба куни ўтказилди.
Жумладан, Тошкентда “Пахтакор” клуби “Насаф”ни қабул қилди. Учрашув голларга бой бўлди.
Ўйиннинг 3-дақиқасида Иброҳим Ибрагимов пенальтидан ҳисобни очди. Орадан 11 дақиқа ўтиб Игор Сергеев ҳисобни иккитага оширди. Шундан сўнг қаршиликлар фаолликни оширди.
28-дақиқада Стефан Чолович ҳисобни қисқартирган бўлса, Акмал Мозговой 32-дақиқада ҳисобни тенглаштирди. “Шерлар” ҳисоб тенглашгач яна олдинга ўтди. 36-дақиқада Дилшод Абдуллаев жамоасини яна ҳисобда олдинга олиб чиқди.
Иккинчи бўлим эса ўйин яна-да “ёнди”. Жумладан, 54-дақиқада Ҳусайн Норчайв ҳисобни тенглаштирди. Орадан 7 дақиқа ўтиб Игор Сергеев дублга эришиб, ҳисобни яна оширди.
69-дақиқага келиб “Насаф” аъзоси Алибек Давронов қизил карточка олиб майдондан четлатилди. Қаршиликлар бир киши кам бўлиб қолганидан фойдаланган “Пахтакор” яна-да фаолликни оширди. 81-дақиқага келиб Брайан Риаскос ҳисобни 5:3 кўринишига келтирди. 85-дақиқада эса Сергеев хет-трик қайд этиб, ўйинга якуний нуқтани қўйиб берди.
Шундай қилиб, “шерлар” “Ҳ” гуруҳида 9 очко билан 1-ўринни эгаллади. “Насаф” эса 3 очко билан 3-поғонада қолиб кетди.
Изоҳ (0)