АҚШ элчихонаси америкаликларни эвакуация қилиш ёки Исроилни тарк этишга кўмаклашиш имкониятига эга эмас. Бу ҳақда Америка дипломатик ваколатхонаси веб-сайтида эълон қилинган баёнотда айтилган.
Таъкидланишича, ҳаво ҳудуди ва Бен-Гурион аэропорти ёпилган шароитда Исроилни тарк этишни истаган барчага АҚШ дипломатик миссияси Иордания-Исроил чегарасидаги қуруқлик чегара ўтиш жойларидан фойдаланиш тавсия этилади. Хабарда айтилишича, Иордания билан чегарадаги қуруқлик ўтиш жойлари очиқ.
Шунингдек, элчихона эҳтиёткор бўлиш ва шахсий хавфсизлик ҳақида хабардорликни ошириш зарурлигини таъкидлаган. Дипломатлар Америка фуқароларига “миномёт, ракета ва учувчисиз учиш аппаратлари ҳужумлари каби хавфсизлик билан боғлиқ ҳодисалар кўпинча огоҳлантиришсиз содир бўлаётгани сабабли” тревога эълон қилинган тақдирда энг яқин бошпана жойлашувини билиб олишни маслаҳат берган.
“Хавфсизлик вазияти мураккаб ва тез ўзгариши мумкин”, дея огоҳлантирмоқда элчихона.
АҚШнинг яҳудий давлатидаги дипломатик ваколатхоналари ходимлари ҳозирча эвакуация қилинмаган ва ўз иш жойларида қолмоқда. Бироқ мамлакатни тарк этишни хоҳловчи оила аъзоларига буни ихтиёрий равишда амалга ошириш имконияти берилган.
Элчихонанинг маълум қилишича, Исроилда қолаётган америкалик дипломатлар ва уларнинг оила аъзоларига кейинги хабаргача яшаш жойлари яқинидаги бошпаналарда доимий равишда бўлиш кўрсатмаси берилган.
АҚШнинг Қуддусдаги элчихонаси ва Тель-Авивдаги консуллик бўлими яқин вақтгача ўз фаолиятини давом эттирган, бироқ 16 июнь куни Америка дипломатик муассасалари кун давомида ёпиқ бўлади.
Изоҳ (0)