Жиззах вилоятининг Шароф Рашидов туманида ер сотиш билан боғлиқ ҳолатлар аниқланди. Бу ҳақда вилоят ИИБ матбуот хизмати хабар берди.
Маълум қилинишича, Жиззах шаҳрида яшовчи Х.Н. фуқаро С.I.га Шароф Рашидов туманидаги тегишли ҳужжатлари бўлмаган 8 сотих бўш ерни унинг номига ўтказиб бериш ва шаҳар кадастрлар палатасидаги танишлари орқали кадастр ҳужжатларини расмийлаштириб беришни ваъда қилган.
Бунинг эвазига 130 млн сўм олган вақтида қўлга олинди. Ҳозирда Х.Н.га нисбатан терговга қадар текширув олиб борилмоқда.
Шунингдек, Шароф Рашидов туманида яшовчи Ҳ.А. давлат захирасидаги 0,6 гектар ер майдонини Жиззах шаҳрида яшовчи Э.З.га 48 млн сўмга сотган вақти ушланди.
Ҳолат юзасидан терговга қадар текширув олиб борилмоқда.
Ерни ноқонуний сотишга уриниш бўйича бошқа ҳолатлар
Фарғонада фуқаро 2,5 гектар ерни 650 минг долларга сотишга келишиб, олдиндан 100 минг долларни олган вақтида ашёвий далиллар билан ушланганди. Тошкент вилояти Оҳангарон туманида жойлашган ва қишлоқ хўжалигига мўлжалланган 32 гектар ерни 2,4 млн долларга ноқонуний сотмоқчи бўлган шахс қўлга олинганди.
Сурхондарё вилоятида фуқаро қишлоқ хўжалигига мўлжалланган 45 сотих ерни 60 минг долларга сотишга келишиб, 56,7 минг доллар ва 43 миллион сўм олган вақтида қўлга тушганди. Хоразм вилоятининг Урганч туманида фуқаро давлат захирасида бўлган 24 сотих ер майдонини кадастр тизимида ишловчи танишлари орқали харидор номига расмийлаштириб бериш эвазига 45 минг доллар ва 13 миллион сўм олган вақтида ушланганди.
Изоҳ (0)