АҚШнинг авиаҳужумларидан олдин Эрон 9 та атом бомбасини яратишга етарли миқдордаги уран захирасини яшириб қўйган бўлиши мумкин. Бу ҳақда манбаларга таяниб Reuters хабар берди.
Халқаро атом энергияси агентлиги (МАГАТЭ) ва бир қатор Европа давлатлари Эронда авиаҳужумлар содир бўлишидан аввал мавжуд бўлган 400 килограммдан ортиқ 60 фоизгача бойитилган ураннинг кейинги тақдири ҳақида аниқ маълумотга эга эмас. Бунга Ғарб мамлакатларининг ядро дастурлар билан шуғулланган ҳозирги ва собиқ амалдорлари билан ўтказилган суҳбатлар асос бўлади.
Уларнинг айтишича, Теҳрон АҚШ ёки Исроил зарбаларидан олдин уран захирасини ядро объектларидан олиб чиқиб, бошқа жойга кўчиришга улгурган ёки йўқлиги номаълум. Манбалардан бири бу вазият Эрон ва Ғарб ўртасида узоқ давом этадиган “мушук-сичқон ўйини”га айланаётганини таъкидлаган.
МАГАТЭ маълумотларига кўра, 2025 йилги ҳарбий тўқнашувлардан аввал Эронда 400 килограммдан ортиқ 60 фоизгача бойитилган уран мавжуд бўлган. Бу эса бойитиш даражаси 90 фоизга етказилса, 9 та атом бомбаси ясаш учун етарли ҳисобланади.
Ҳатто бу захиранинг кичик бир қисми ҳам ҳисобдан чиқиб қолса, Ғарб учун бу жиддий хавф бўлиши мумкин. Чунки бу Эроннинг ядро қуролини яширин равишда сақлаб қолиш эҳтимолини кучайтиради, дейилади хабарда.
Эрон ҳукумати АҚШ зарбаларидан олдин айрим ядро объектларини бошқа жойга кўчирганини билдирганди. Financial Times газетаси ҳам Европа разведка хизматларидаги манбаларга таяниб шунга ўхшаш хулосани берган. МАГАТЭ бош директори Рафаэл Гросси эса бу эҳтимолни инкор этмаган.
Шунга қарамай, АҚШ ҳукумати Теҳрон бойитилган уранни ҳужумдан олдин олиб чиқиб кетганига ишонмайди. Президент Дональд Трамп ҳамда Пентагон раҳбари Пит Хегсет буни рад этган.
Изоҳ (0)