Ўзбекистонда 2024 йил бошидан бери болалар нафақаси олувчилар сони кескин қисқаришда давом этмоқда. Бунинг натижасида мазкур турдаги нафақаларга ажратиладиган маблағлар ҳам сезиларли камайган.
2025 йил 1-чоракда 774,7 минг оилага 1 трлн 164 млрд сўм миқдорида болалар нафақаси тўланди. 2024 йил мос даврида бу рақам 2,4 трлн сўм атрофида эди. Яъни ўтган йилнинг январида 1,9 млн оилага 888,7 млрд сўм, февралида 1,7 млн оилага 795,6 млрд сўм, мартида 1,5 млн оилага 711 млрд сўм бола пули берилган.
Статистик рақамларга қаралса, 2024 йил январидан жорий йил апрелигача 1 млн 158 мингта оилага бола пули тўлаш тўхтатилганини кўриш мумкин. Тўлов миқдори ҳам бир йил аввалги деярли 900 млрд сўмдан 361 млрд сўмгача камайтирилган.
Болалар нафақаси бериладиган оилалар сони ўтган йил январидан 2025 йил мартигача энг кўп қисқарган ҳудуд Қашқадарё вилояти бўлган. Ҳудудда 2024 йилнинг бошида 225 886 оила бола пули олган бўлса, 2025 йил мартига келиб 46 900 та қолган.
Бу даврда аҳоли сони бўйича републикада етакчи Самарқанд вилоятида болалар нафақаси олувчи кам таъминланган оилалар сони 233 940 тадан 79 171 тага камайган. Шу билан бирга, Наманган (206 766 тадан 82 331 тага), Фарғона (221 031 тадан 94 884 тага), Сурхондарё (203 000 тадан 76 875 тага), Андижон (188 721 тадан 53 494 тага) вилоятларида йирик қисқартиришлар амалга оширилган.
Маълумот учун, ўтган 3,5 йилдан ортиқ вақт давомида “музлатилган” болалар нафақаси миқдори 2025 йил июлдан 10 фоизга ошириладиган бўлди (қиймат 2021 йил 1 сентябрдан бери ўзгармаган)
Ҳозир мамлакатда болалар нафақаси ёшга қараб қуйидаги миқдорларда тўланмоқда:
- 3 ёшгача бўлган бир нафар болага — 325 000 сўм (июлдан 360 000 сўм бўлади);
- 3 ёшдан 18 ёшгача бўлган бир фарзандга — 250 000 сўм (июлдан 275 000 сўм);
- оиланинг иккинчи фарзанди учун қўшимча — 150 000 сўм (165 000 сўм);
- учинчи ва ундан кейинги ҳар бир болага — 100 000 сўмдан (июлдан 110 000 сўм).
Жорий йилда давлат бюджетидан болали ва кам таъминланган оилаларга 7,3 триллион сўм миқдорида нафақалар тўланиши кўзда тутилган. Ўтган 2024 йилда мзакур кўрсаткич 8,1 триллион сўмни ташкил этган.
Изоҳ (0)