Ўзбекистонда олти ойлик нафақа тўловлари бўйича маълумот берилди

Ижтимоий ҳимоя миллий агентлиги 2024 йилнинг январь–июнь ойларида аҳолига қанча миқдорда нафақа маблағлари тўланганини маълум қилди.

Биринчи ярим йилликда Ўзбекистон фуқароларига нафақалар учун жами 7,7 триллион сўм тўлаб берилган. Шундан кам таъминланган оилаларга болалар нафақаси ва моддий ёрдам миқдори 4,3 триллион сўмни (55,5 фоиз) ташкил этган.

Ижмоий нафақалар учун 3,1 триллион сўм (40,2 фоиз), бир марталик нафақа тўловларига 313,4 миллиард сўм, ўзгалар парваришига муҳтож бўлган ёлғиз кексалар ва ногиронлиги бўлган шахсларга моддий ёрдам учун 6,5 миллиард сўм тўлаб берилган. Шу билан бирга, Қорақалпоғистон Республикаси ва Хоразм вилоятидаги муҳтож оилаларга жами 8,7 миллиард сўмлик бир марта бериладиган моддий ёрдам пулари тарқатилган.

Республика миқёсида энг кўп миқдордаги нафақа пулларини Самарқанд (945,7 миллиард сўм), Қашқадарё (887,6 миллиард сўм) ва Фарғона (843,4 миллиард сўм) вилоятлари аҳолиси олган.

Наманган (750,8 миллиард сўм), Сурхондарё (732 миллиард сўм), Андижон (747,7 миллиард сўм) вилоятларига ҳам нисбатан кўп нафақалар ажратилган.

Энг кам нафақа маблағлари Навоий (205 миллиард сўм), Сирдарё (223,1 миллиард сўм) ва Тошкент шаҳрига (281,3 миллиард сўм) йўналтирилган.

Агентлик хабарига кўра, 2024 йил 1 июнь ҳолатига Ўзбекистонда ижтимоий нафақа ва моддий ёрдам олувчи оилалар сони 1,2 миллионтани ташкил этган. Шундан 1 миллион 170 минг оила болалар нафақаси олган. Республикада жами оилалар сонига нисбатан ижтимоий нафақа ва моддий ёрдам олувчи оилаларнинг улуши 12 фоизгача пасайган.