Ўзбекистонда кам таъминланган оилаларга электр ва газ тўловларида компенсация берилади. Бу ҳақда “Ёқилғи-энергетика соҳасида бозор меҳанизмларини жорий этишда эҳтиёжманд аҳолини давлат томонидан қўллаб-қувватлашнинг қўшимча чора-тадбирлари тўғрисида”ги президент қарорида белгиланди.
Унга кўра, 2025 йил 1 майдан 2027 йил 1 апрелга қадар “Ижтимоий ҳимоя ягона реестри” ахборот тизими орқали болалар нафақаси ва моддий ёрдам олувчи ҳамда Камбағал оилалар реестрига киритилган, шунингдек, реестрларга киритилмаган, бироқ моддий аҳволи бўйича кам таъминланган оилалар мезонларига тўғри келувчи, оиладаги жон бошига даромади минимал истеъмол харажатларининг 1,5 баробаридан ошмайдиган оилаларга:
- электр энергияси истеъмоли бўйича – ойига базавий меъёрдан 150 кВт соатгача;
- табиий газ истеъмоли бўйича – иситиш мавсумида ойига базавий меъёрдан 250 куб метргача, бошқа даврларда ойига базавий меъёрдан 150 куб метргача ортиқ фойдаланилган қисми учун базавий меъёр доирасидаги ҳамда базавий меъёрдан ошган нархлар ўртасидаги фарқ компенсация қилиб берилади.
2025—2026 йилги иситиш мавсумида аҳолининг эҳтиёжманд қатламини қўшимча моддий жиҳатдан қўллаб-қувватлаш мақсадида 2025 йилнинг ноябрь ойида қуйидаги оилаларга 1 миллион сўмдан бир марталик моддий ёрдам ажратилади:
- реестрларга киритилган оилаларга;
- “маҳалла еттилиги” хулосаси асосида реестрларга киритилмаган, бироқ ёрдамга муҳтож оилаларга.
Иккинчи ҳолатда “маҳалла еттилиги” томонидан қўшимча рўйхат шакллантиришда биринчи навбатда боқувчисини йўқотган оилалар, аъзолари I ёки II гуруҳ ногирони бўлган шахслардан иборат бўлган оилалар, ногиронлиги бўлган болаларни парваришлаётган оилалар, узоқ муддатли даволанишни талаб этадиган касалликлар билан касалланган шахслар яшовчи оилалар, ўзгалар парваришига муҳтож бўлган ёлғиз яшовчи шахслар ҳамда ёлғиз яшовчи кексалар ва ногиронлиги бўлган шахслар, уч ва ундан ортиқ оила яшайдиган хонадонларда ҳамда газ таъминоти бўлмаган ва марказлашган тартибда иситилмайдиган кўп қаватли уйларда яшовчи оилалар инобатга олинади.
Қўшимча рўйхат 1 октябргача шакллантирилади. Бир марталик моддий ёрдам ноябрь ойида тўланади.
Қўшимча равишда шакллантириладиган рўйхатдаги оилалар сони реестрга киритилган оилалар сонининг 40 фоизидан ошмаслиги лозим.
Ўзбекистон маҳаллалари уюшмаси ва Ижтимоий ҳимоя миллий агентлиги аҳолига моддий ёрдам ажратишда маҳалла раислари томонидан шаффофлик ва адолатлилик таъминланишини кафолатлаши ва шахсий жавобгарлигини белгилаши лозим.
Қорақалпоғистон Республикаси Вазирлар Кенгаши раиси, вилоятлар ва Тошкент шаҳар ҳокимликлари бир марталик ёрдамни тўлаш бўйича қўшимча рўйхатнинг тўғри шакллантирилиши ҳамда тўловларнинг ўз вақтида амалга оширилишига шахсан жавобгар этиб белгиланди.
Изоҳ (0)