“Дарё”да республиканинг Жиззах ва Андижон вилоятларида июль ойи учун болалар пули тўлаб берилмагани, масъуллар бу муаммо нафақат Жиззах ва Андижонда, бошқа вилоятларда ҳам бор эканини тан олгани ёзилган мақола эълон қилинганди. Мазкур мақоладан сўнг “Дарё”га республиканинг Сурхондарё, Қашқадарё, Самарқанд вилоятида яшовчи фуқаролар ҳам мурожаат йўллаб, бола пули кечикаётганидан шикоят қилди.
Таҳририятга Самарқанд вилоятининг Паяриқ туманидан 2023 йилнинг 3 август куни мурожаат йўллаган Умида Аллаева 2023 йилнинг июль ойи учун бола пули олмаганини, маблағ кечиккани боис болалар боғчаси учун тўлов қилишда муаммоларга дуч келаётганини маълум қилди.
Имкони бўлса, суриштиришни тўхтатманг, мендан олдин мурожаат қилганлар Андижон ва Жиззах вилоятида яшовчилар экан, шу муаммони аниқлаштиришда ёрдам беринг, — дейди мурожаатчи.
Қашқадарё вилоятининг Шаҳрисабз туманида яшовчи фуқаро ҳам таҳририятга мурожаат қолдириб, бола пулини ўз вақтида ололмаётганини билдирган.
Бола пули нега шу пайтга қадар тушмаётгани ва кечикаётгани сабаби ҳақида маълумот беринг. Бугун тушади, эртага тушади, деб ортга суриб келишяпти. Айримларга тушган, лекин жуда кўпчилик ҳалигача олмаган, — дейди қашқадарёлик мурожаатчи.
Сурхондарё вилоятининг Термиз туманидан мурожаат қилган Нигора исмли фуқаронинг айтишича, уларда ҳам шу муаммо бор.
Бизга ҳалигача пул тушмади, янгилик йўқ, — дейди бу ҳақда таҳририятга билдирган мурожаатчи.
Андижон вилоятининг Андижон шаҳридан мурожаат йўллаган Мубина Жўраева исмли фуқаро бола пулини олмаганини, муаммо юзасидан тушунтириш ҳам берилмаганини айтиб, шикоят қилди.
Июль ойида болалар пулининг кечикишига изоҳ берган Иқтисодиёт ва молия вазирлиги ахборот хизмати раҳбари Сарвиноз Аҳмедова электрон тизимдаги муаммолар сабаб, жумладан, “ведемост” кеч қолгани учун июль ойидаги болалар пули кеч тўланганини маълум қилди.
Вазирликнинг билдиришича, болалар нафақаси Вазирлар Маҳкамасининг “Аҳолини ижтимоий ҳимоя қилиш тизимини янада такомиллаштириш чора-тадбирлари тўғрисида” 2021 йил 21-октябрдаги 654-сон қарорига асосан ойнинг 4-санасидан 27-санасига қадар тўлаб берилади.
Қўшимча қилинишича, жорий йилнинг июль ойида “Ижтимоий ҳимоя ягона реестри” АТ орқали республикадаги кам таъминланган оилаларга 949,4 миллиард сўм ижтимоий нафақа тўлаб берилган.
Изоҳ (0)