O‘zbekistonda 2024-yil boshidan beri bolalar nafaqasi oluvchilar soni keskin qisqarishda davom etmoqda. Buning natijasida mazkur turdagi nafaqalarga ajratiladigan mablag‘lar ham sezilarli kamaygan.
2025-yil 1-chorakda 774,7 ming oilaga 1 trln 164 mlrd so‘m miqdorida bolalar nafaqasi to‘landi. 2024-yil mos davrida bu raqam 2,4 trln so‘m atrofida edi. Yaʼni o‘tgan yilning yanvarida 1,9 mln oilaga 888,7 mlrd so‘m, fevralida 1,7 mln oilaga 795,6 mlrd so‘m, martida 1,5 mln oilaga 711 mlrd so‘m bola puli berilgan.
Statistik raqamlarga qaralsa, 2024-yil yanvaridan joriy yil apreligacha 1 mln 158 mingta oilaga bola puli to‘lash to‘xtatilganini ko‘rish mumkin. To‘lov miqdori ham bir yil avvalgi deyarli 900 mlrd so‘mdan 361 mlrd so‘mgacha kamaytirilgan.
Bolalar nafaqasi beriladigan oilalar soni o‘tgan yil yanvaridan 2025-yil martigacha eng ko‘p qisqargan hudud Qashqadaryo viloyati bo‘lgan. Hududda 2024-yilning boshida 225 886 oila bola puli olgan bo‘lsa, 2025-yil martiga kelib 46 900 ta qolgan.
Bu davrda aholi soni bo‘yicha republikada yetakchi Samarqand viloyatida bolalar nafaqasi oluvchi kam taʼminlangan oilalar soni 233 940 tadan 79 171 taga kamaygan. Shu bilan birga, Namangan (206 766 tadan 82 331 taga), Farg‘ona (221 031 tadan 94 884 taga), Surxondaryo (203 000 tadan 76 875 taga), Andijon (188 721 tadan 53 494 taga) viloyatlarida yirik qisqartirishlar amalga oshirilgan.
Maʼlumot uchun, o‘tgan 3,5 yildan ortiq vaqt davomida “muzlatilgan” bolalar nafaqasi miqdori 2025-yil iyuldan 10 foizga oshiriladigan bo‘ldi (qiymat 2021-yil 1-sentyabrdan beri o‘zgarmagan)
Hozir mamlakatda bolalar nafaqasi yoshga qarab quyidagi miqdorlarda to‘lanmoqda:
- 3 yoshgacha bo‘lgan bir nafar bolaga — 325 000 so‘m (iyuldan 360 000 so‘m bo‘ladi);
- 3 yoshdan 18 yoshgacha bo‘lgan bir farzandga — 250 000 so‘m (iyuldan 275 000 so‘m);
- oilaning ikkinchi farzandi uchun qo‘shimcha — 150 000 so‘m (165 000 so‘m);
- uchinchi va undan keyingi har bir bolaga — 100 000 so‘mdan (iyuldan 110 000 so‘m).
Joriy yilda davlat byudjetidan bolali va kam taʼminlangan oilalarga 7,3 trillion so‘m miqdorida nafaqalar to‘lanishi ko‘zda tutilgan. O‘tgan 2024-yilda mzakur ko‘rsatkich 8,1 trillion so‘mni tashkil etgan.
Izoh (0)