Букингем саройи малика Кейт Миддлтон вафот этган тақдирда амалга ошириладиган “Рединг кўприги операцияси” номли махфий режа тайёрлаган. Бу ҳақда белгиялик журналист ва Британия қироллик оиласи бўйича солномачи Бертран Деккерс ўз китобида маълум қилган, дея Le Figaro нашри хабар берди.
Деккерснинг ёзишича, шу кунгача бу каби режа ҳақида расмий маълумот бўлмаган, у ўта махфий тарзда сақланган. Букингем саройи малика вафоти эҳтимолига доир жамоатчиликдан пухта яширилган протокол тузган.
Режа номини Кейтнинг турмуш ўртоғи шаҳзода Уилям танлаган. Бу танлов бежиз эмаслиги таъкидланмоқда. Жумладан, Рединг — Буюк Британиянинг Беркшир графлигидаги шаҳар бўлиб, айнан шу ерда Кейт 1982 йил 9 январда туғилган.
Шунингдек, режанинг қисқартмаси —O.R.B (Operation Reading Bridge) — рамзий маънога эга. Орб — қирол ёки қиролича тож кийганда чап қўлида тутадиган, устида хоч бўлган қироллик нишони бўлиб, Худонинг ер устидаги ҳокимиятини ифодалайди.
Деккерс бу маълумотни ўзининг “Жеймс Бондга ўхшаган” манбаларидан бири орқали олганини таъкидлайди. Унинг фикрича, операция номи деярли шаҳзода Уилямдан Кейтга билдирилган севги изҳори сифатида талқин қилиниши мумкин.
Маликанинг соғлиғи ҳақида
2024 йил бошида малика Кейт Миддлтон қорин бўшлиғида жарроҳлик амалиётини ўтказган. Шундан сўнг шифокорлар унда саратон касаллигини аниқлаган. У касалхонада уч ҳафта давомида даволанган.
2024 йил март ойида расмий баёнот орқали Кейт кимётерапия курсини бошлагани эълон қилинган. Январь ойида 43 ёшга тўлган Миддлтон, 14 март куни ремиссияга эришганини билдирган ва аста-секин қиролликдаги вазифаларига қайтишни бошлаган.
Изоҳ (0)