Профилактик кимётерапиядан ўтаётган Уэльс маликаси Кейт Миддлтон сўнгги ҳафталарда саратон касаллигининг “инқирозли даврини енгиб ўтди” ва ҳозирда ўзини анча яхши ҳис қилмоқда. Бу ҳақда Vanity Fair нашрига таяниб “Правила жизни” хабар берди.
“Унинг муолажаларни яхши кечираётгани ҳамда ўзини анча яхши ҳис этаётгани менга анча таскин берди. Шубҳасиз, бу ўта мураккаб ва ташвишли жараён. Уильям, унинг ота-онаси, синглиси ва укаси Кейтнинг атрофида жипслашган”, — дейди қироллик оиласининг дўсти.
Аввалроқ оммавий ахборот воситаларида Миддлтон оиласи билан сайр қилаётгани ҳақидаги маълумотлар пайдо бўлган эди. Ҳатто шу мазмундаги видеони қироллик оиласининг расмий YouTube канали ҳам тақдим этганди.
Шу сабабли Уэльс маликаси 2024 йил охиригача ёки куз фаслигача жамоат вазифаларини бажаришга қайтиши мумкинлиги ҳақида тахминлар пайдо бўлди. Аммо Vanity Fair манбаси бу хабарларни тасдиқламади.
Қайд этилишича, Миддлтон ишга қайтишга шошилмаяпти ва бор эътиборини бутунлай соғайишга қаратмоқда. У ўзини тўлиқ яхши ҳис қилганда ва шифокорлар рухсат берганида қироллик оиласига оид вазифаларини бажаришга қайтади.
Кейт Миддлтон саратон касаллигига чалингани ҳақида шахсан ўзи март ойидаги видеомурожаатида хабар берганди. Шу йилнинг февраль ойида буюк Британия қироли Чарльз III да ҳам саратон касаллиги аниқланганди.
Изоҳ (0)