Летиция Ортис Роксаланонинг аждодлари орасида аслзодалар бўлмаган. Унинг бобоси таксичи, отаси журналист, онаси оддий ҳамшира бўлган. Қандай қилиб у Испания шаҳзодасининг муҳаббатини қозонган? Шунчаки тасодиф орқали.
Келажагига сабабчи бўлган касб
Летиция болаликдан журналистикага қизиқарди. 10 ёшиданоқ у Испан радиоэшиттиришларида иштирок этарди. Мадрид университетининг журналистика факультетида ўқиётганда, қиз газетада ишлайди ва дипломини олиш билан телевидениега кўнгилли журналист сифатида ишга киради. У муҳим сиёсий воқеаларни, ҳодисаларни, шу жумладан, терактларни ёритади.
1998 йил августда Летиция биринчи муҳаббати — мактаб ўқитувчиси Алонсо Гуэрреро Перес билан турмуш қуради. Лекин бир йил ўтиб, никоҳ бекор қилинади.
Летиция шаҳзодани журналисткада ишлаб юрганида учратади. 2002 йил ноябрда Летиция Испаниянинг шимолига сафарга чиқади. У ерда қирол оиласидан вакил сифатида чиққан шаҳзода Филипп билан танишади.
Журналистдан маликага
2003 йил 1 ноябрда эса Летиция ва Фелиппе илк учрашган кунда, қироллик саройи уларнинг тўйи бўлаётганини эълон қилади. Олти кун ичида тантанали унаштирув маросими бўлиб ўтади. Фелиппе тўй маросимида Летицияга олмослар билан безатилган узук совға қилади, Летиция эса турмуш ўртоғига оқ олтиндан ясалган узук ва Мариано Хосе де Ларранинг китобини беради.
Унаштирувдан сўнг, Ортис телевидениедаги ишидан кетади ва саройга кўчиб ўтади. Уларнинг тўйи 2004 йил майда Мадриднинг Санта-Мария-ла-Реял-де-ла-Алмудена катедралида бўлиб ўтади. Келинчак фил суяги рангидаги ҳашаматли либосда, олмос тиарада кўриниш беради. Европада 1,5 миллиард одам ушбу маросимни томоша қилди.
2005 йил 31 октябрда жуфтликнинг тўнғич қизи Леонор дунёга келади, 2007 йилнинг апрелида эса иккинчи қизи София туғилади.
Севги ва нафрат
Летиция тезда умр йўлдошининг севимли қироличасига ва бутун дунё бўйлаб энг кўп муҳокама қилинадиган қироллик вакилига айланади. бўлди. У тез-тез замонавий кийинадиган машҳур аёллар рўйхатига киритилади. Қизиғи шундаки, қиролича фақат испан брендлари, масалан Зара ва Манго либосларини кийишни яхши кўради. Яъни унинг образларини ҳар қандай ўртача маошли аёл такрорлаши мумкин. Албатта, Летиция баъзан дизайнерлик либосларида ҳам пайдо бўлади, аммо уларни кўпинча қиммат бўлмаган аксессуарлар билан тўлдиради.
Яхши диди ва тежамкорлиги учун Летиция “британиялик Золушка” Кейт Миддлтон билан таққосланади. Британия матбуоти қироллик аъзоларининг либосларини батафсил таҳлил қилади. Бироқ баъзан журналистлар испан қироличасини жуда кўп гулли туфли ёки очиқ деколте учун танқид қилишади.
2008 йилда қиролича бурун деворини тўғрилаш учун ринопластика қилдирган. Аммо ОАВ ушбу операциядан сўнг унинг бурни текис ва қисқа бўлиб қолганини танқид қила бошлади.
Бу ҳам етмагандек, Летициянинг амакиваччаси Давид “Хайр, шаҳзодам” китобини ёзади. Ўз асарида у Летициянинг никоҳдан олдинги шахсий ҳаётини ёритади… Бироқ Испания телевидениесига берган интервьюсида у қариндошини танқид қилишни мақсад қилмаганини, фақат монархия ва мамлакат институтларига қарши эканлигини билдиради.
Аммо барча бу танқидларга қарамай, қиролича Летиция ўзини қўлга олди. Энг салбий изоҳлар ҳам уни хафа қила олмади. У ҳар доим табассум қилади ва мукаммал кўринишнинг уддасидан чиқади.
Изоҳ (0)