42 ёшли Уэлс маликаси Кейт Миддлтон саратон касаллигига қарши курашдаги кичик ютуқлари ва оғир дамлари ҳақида ўзининг Instagramъдаги саҳифасида маълум қилди, деб ёзди “Правила жизни”.
“Мен саратонга қарши курашда кичик бўлса-да, сезиларли ютуқларга эришдим, аммо кимётерапиядан ўтаётган ҳар бир бемор каби менинг ҳам яхши, ҳам ёмон кунларим бўлиб туради”, — деб ёзади Британия валиаҳд шаҳзодасининг рафиқаси.
“Ёмон кунларда мен заифлик, чарчоқни ҳис қиламан. Бундай пайтда танага дам бериш керак. Аммо яхши кунларда ўзимни тетик ва кучлироқ ҳис қилганимда ижобий ҳолатимдан максимал фойда ва завқ олишни истайман”, — дея қўшимча қилди Миддлтон.
Уэлс маликаси 15 июнь, шанба куни Британия қироли Чарльз III нинг расмий туғилган куни муносабати билан (ҳақиқий туғилган кун санасидан фарқ қилади) бўлиб ўтган парадда иштирок этди. Бу Миддлтоннинг касаллиги ҳақида эълон қилганидан кейин биринчи марта омма олдида чиқиши бўлди. Тадбирдан аввал Кейт қиролнинг туғилган куни парадини интиқлик билан кутаётгани, тадбирда оиласи билан иштирок этиши ҳамда ёз ойида яна бир нечта ижтимоий тадбирларга қўшилишини маълум қилган эди.
“Лекин энг ёмони ҳали ортда қолмаганини биламан”, — деб ёзади Миддлтон.
Кейт туғилган кун парадига ўз фарзандлари шаҳзода Жорж, малика Шарлотта, шаҳзода Луи билан парад майдони ёнидаги Букингем саройидан маросимни томоша қилиш учун ташриф буюрди.
Кейт Миддлтон 2023 йил декабрь ойидан буён омма олдида кўриниш бермаган, у январь ойида қорин бўшлиғида жарроҳлик амалиётини ўтказган эди. 2024 йилнинг 22 март куни Уэлс маликаси саратонга чалинганини эълон қилди.
Шу йилнинг февраль ойида Буюк Британия қироли Чарльз III ҳам саратон касаллигига чалинди. Букингем саройи матбуот хизмати у давлат ишлари билан шуғулланишда давом этишини, бироқ оммавий тадбирларда камроқ намоён бўлишини айтди.
Изоҳ (0)