Numbeo сайтида эълон қилинган 2025 йил ярим йиллиги бўйича халқаро жиноятчилик даражаси индексида Ўзбекистон хавфсизлик бўйича 148 та давлат ичидан 25-ўринни эгаллади.
Ушбу рейтинг веб-сайтга ташриф буюрган фойдаланувчилар томонидан тўлдирилган сўровномаларга асосланган бўлиб, улар илмий ва давлат ташкилотлари томонидан олиб бориладиган сўровномаларга ўхшаш тарзда тузилган. Рейтинг жиноятлар индекси ва хавфсизлик индекслари асосида тузилган.
Жиноятчилик индекси — бу шаҳарда ёки мамлакатда жиноятчилик даражасининг умумий кўрсаткичини баҳоловчи мезондир. У қуйидагича таснифланади:
- жуда паст: 20 дан кам;
- паст: 20–40;
- ўртача: 40–60;
- юқори: 60–80;
- жуда юқори: 80 дан баланд.
Жиноятлар индексида пастроқ балл олган мамлакат шунчалик хавфсиз ҳисобланади.
Хавфсизлик индекси эса, асосан, жиноятчилик индексининг тескариси ҳисобланади. Яъни хавфсизлик индекси юқори бўлган шаҳар жуда хавфсиз деб ҳисобланади.
2025 йил биринчи ярим йиллигида Ўзбекистон ушбу индекс бўйича Марказий Осиё давлатлари орасида 73,4 индекс билан энг хавфсиз мамлакат бўлди. Қозоғистон 73-ўринда (54,4), Қирғизистон — 101-ўринда (48) жойлашди. Рейтингга Туркманистон ва Тожикистон киритилмаган.
Гаити жиноят энг кўп содир бўладиган мамлакат сифатида рейтингда биринчи ўринни олди. Жиноятчилик юқори бўлган давлатлар бешталигига Папуа Янги Гвинея (80,7), Венесуэла (80,5), Афғонистон (75,2) ва Жанубий Африка (74,6) давлатлари кирди.
Энг хавфсиз мамлакатлар деб эса БАА, Андорра ва Қатар тан олинди.
2024 йил биринчи ярим йиллигида Ўзбекистон хавфсизлик рейтингида 71 индекс билан 27-поғонани эгаллаган эди.
Изоҳ (0)