Қирғизистон ва Ўзбекистон ўртасидаги “Дўстлик” чегара божхона постида коррупция ҳолатлари тўхтаган. Бу ҳақда Қирғизистон Вазирлар Маҳкамаси раиси ўринбосари — Миллий хавфсизлик қўмитаси раҳбари Қамчибек Ташиев 8 июль куни Ўш вилоятига қилган ташрифи чоғида маълум қилинди, дея хабар бермоқда “Телеканал регион”.
Масъуллар билан мулоқотда Қамчибек Ташиевнинг “Кирган-чиққанлардан — пиёдалар, автомашиналардан пул олиш тўхтадими?”, деган саволига чегара-божхона пости раҳбарлари “Тўхтаган”, деб жавоб берди.
Агар қарасангиз тўхтайди. Сиз қарамай қўйсангиз бир-бирига уланиб кетаверади. Фақат чегарачилар эмас, божхоначилар ҳам жавобгар.
Ҳеч қандай коррупция йўқ, кирган-чиққан машиналардан, товарлардан, одамлардан ҳеч нарса олингани йўқ, аниқми? Телевидение тасвирга оляпти. Эртага менга кимдир шикоят қилса, жавоб берасиз. Шунинг учун яхшилаб қаранглар. Бу ўйин ёки оддий кўрсатма эмас.
Шунчаки ишлаш ёки қандайдир йўл билан пул қилиш ҳақида ўйламанг. Бу умуман бўлмайди ва бунга йўл ҳам қўймаймиз. Агар эплолмасанглар, ўрнингларга бошқалар келади, деди Миллий хавфсизлик қўмитаси раҳбари.
Ташриф давомида Қамчибек Ташиев Ўш вилояти ички ишлар бошлиғига Ўзбекистондан ўтаётган шахслар билан боғлиқ муаммолар бўлмаслиги, тинч келиб-кетишлари учун шароит яратиш бўйича топшириқ берган.
Изоҳ (0)