АҚШ президенти Дональд Трамп бир пайтлар Россия президенти Владимир Путинни Украинага ҳужум қилишдан қайтармоқчи бўлиб, “Москвани бомбардимон қилиш” билан таҳдид қилган. У ҳудди шу мазмунда Хитойга ҳам огоҳлантириш берган. Бу ҳақда ёзиб олинган аудиоларга таяниб CNN хабар берди.
Трамп Россия раҳбарига огоҳлантириш берганини таъкидлаган.
“Агар Украинага кирсангиз, мен Москвани бомбардимон қиламан. Сизни огоҳлантиряпман. Бошқа иложим қолмайди”, деган Трамп Путинга қарата.
Путин эса бунга жавобан унга ишонмаслигини айтган. Лекин АҚШ президенти Путин унга “10 фоиз” ишонганини таъкидлаган. Кейинроқ Трамп Хитой раҳбари Си Цзиньпинга ҳам шу мазмунда таҳдид қилган. Трамп агар Хитой Тайванга бостириб кирадиган бўлса, Пекинни бомбардимон қилишини билдирган.
“У мени ақлдан озган деб ўйлади. Чунки орамизда ҳеч қандай муаммо йўқ эди”, деди Трамп Си ҳақида.
Трампнинг бу таҳдидларининг аудиоси у президентликка иккинчи маротаба ўз номзодини қўйганда тарқалиб кетган. Хусусан, бу гаплар Нью Йорк ва Флоридадаги 2024 йилги маблағ йиғиш тадбирларида ёзиб олинганди. Кейинчалик бу аудио материаллар Жош Доуси, Тайлер Пейжер ва Исаак Арнсдорф томонидан қўлга киритилиб, улар ўзларининг “2024” номли китобида баъзи маълумотларни тақдим этган. Аудиофайллар дастлаб эфирга узатилмаган. Трамп маъмурияти эса аудиотасмаларга изоҳ беришдан бош тортган.
Аудиода Трампнинг ёпиқ эшиклар ортида бой хайриячилар билан суҳбати акс этган. Жумладан, у нафақат ўзининг ташқи сиёсат стратегияси, балки талаба намойишчиларни депортация қилиш борасида ҳам ўз фикрини билдирган. Трамп агар Жо Байден ўрнига президент бўлган тақдирда, Украина ва Ғазодаги можароларга барҳам беришини маълум қилган. Президент ҳозирда ҳам бу икки урушни тугатишга ваъда бериб келмоқда.
АҚШ президенти 8 июль куни ҳам Путиннинг тинчлик келишувига рози бўлмаётганидан норозилигини айтган.
“Мен Путиндан мамнун эмасман. Мен улардан жуда норозиман”, деди Трамп Вазирлар маҳкамаси йиғилишида.
Изоҳ (0)