Мамлакатда ҳар йили 11 минг номдаги китоблар 40 миллион нусхада нашр қилинмоқда. Бу ҳақда 8 июлдаги Олий Мажлис Қонунчилик палатаси йиғилишида депутат Зуҳра Мирғозиева маълум қилди.
Зуҳра Мирғозиеванинг айтишича, охирги тўрт йилда Ўзбекистондаги нашриётлар сони 3,5 баробарга кўпайган ва 601 тага етган.
“Шундан хусусий нашриётлар сони 538 тани ташкил этмоқда. Нашриётларнинг ишлаб чиқариш қуввати икки баробар ошиб, ҳар йили ўртача 11 минг номда жами 40 миллион нусхада адабиётлар нашр этилмоқда. Соҳага 25 миллион доллар тўғридан-тўғри инвестициялар киритилди. 2025 йил 1 январдан бошлаб нашриёт корхоналари фойда солиғини тўлашдан беш йил муддатга озод этилди”, деди депутат.
Эслатиб ўтамиз, 2023 йилда Шавкат Мирзиёев Ўзбекистон президентлигига номзод сифатида тошкентлик сайловчилар билан учрашганди. Ўшанда келгуси етти йилда китоблар нашр қилиш ва кутубхоналарга қандай эътибор қаратилиши ҳақида режалар айтилган.
“Ҳар йили 100 та энг яхши бадиий асар ҳамда болалар ва ўсмирларга мўлжалланган 50 та бадиий китоблар яратиш учун ижодий буюртма берилиб, муаллифларга 100 миллион сўмдан қалам ҳақи тўланади. Бу китоблар 20 минг нусхадан нашр қилиниб, мактаблар ва кутубхоналарга бепул берилади. Бунга ҳар йили 200 миллиард сўм йўналтирамиз. Шунингдек, келгуси етти йилда кутубхоналарнинг 40 миллионга яқин китоб фонди тўлиқ рақамлаштирилади ва уларнинг ягона каталоги яратилади. Умуман, 2030 йилга қадар мамлакатимиздаги барча кутубхоналар тўлиқ таъмирланади. Шу мақсадда 500 миллиард сўм ажратамиз”, деган айни пайтдаги мамлакат президенти.
Шу билан бирга, Шавкат Мирзиёев мактаб кутубхоначиларининг иш ҳақи педагог ходимлар ойлигига тенглаштирилишини ҳам маълум қилган.
Ўтган йилги китоблар фестивалида “Академнашр” нашриёти раҳбари Санжар Назар мамлакатда 2020 йилдан кейин китоблар сотувида ўсиш тўхтаб қолганини айтган.
Аввалроқ Жиноят кодексига Ўзбекистонда китоб ўқиган маҳбуснинг жазо муддати қисқартиришга оид модда киритилаётгани хабар қилинганди. Китоб ўқишга жалб қилиш орқали маҳкумларни ахлоқан тузатиш назарда тутилган. Маҳкум рўйхатдаги битта китобни ўқиб, имтиҳон топширса, унинг қамоқдаги жазоси 3 кунга қисқартирилади. Бунда йилига кўпи билан 10 та китоб ўқиш мумкинлиги белгиланиш қайд этилган.
Изоҳ (0)