O‘zbekistonda kitoblar qator omillar sabab tobora kamroq sotilmoqda. Bu haqda noshir, “Akademnashr” nashriyoti rahbari Sanjar Nazar UzReport TV’ga bergan intervyusida aytib o‘tdi.
16-sentyabr kuni Toshkent viloyatida “Bitmas xazina” kitob festivali o‘tkazildi. Tadbir doirasida telekanal muxbiri Sanjar Nazardan kitob savdosi qanday ketayotgani bo‘yicha fikrlarini so‘ragan. Noshirning taʼkidlashicha, 2020-yildan keyin kitoblar sotuvida o‘sish to‘xtab qolgan.
“Kitoblar sotuvida oxirgi to‘rt yil davomida pasayish bor. Har yili kitob savdosi kamayib kelmoqda. Bu jahonda kuzatilayotgan iqtisodiy–siyosiy jarayonlar, urushlar, aholining real daromadlari kamayishi va soliq yukining ortib ketgani bilan bog‘liq. Hozir kitob sohasini soliqlardan butunlay ozod qilish haqida fikrlar yangramoqda. Agar shunday qilinsa, yengillik bo‘lsa, savdo hajmi ortardi deb o‘ylayman”, dedi noshir.
Sanjar Nazar mamlakatda mualliflik huquqi taʼminlanmayotgani ham katta muammo ekanini aytdi.
“Bizda hali mualliflik huquqi bo‘yicha madaniyat yetarli darajada emas. Hatto ayrim nashriyotlar ham bu huquqqa umuman amal qilmasdan faoliyat yuritmoqda. Mualliflik huquqi bo‘yicha qonun ishlashini muntazam nazorat qilinmasa, sohada qonunbuzarlik uchun ko‘riladigan choralar muqarrarligi taʼminlanmasa, ahvol o‘nglanmaydi”, dedi mutaxassis.
Izoh (0)