Ўзбекистонда китоблар қатор омиллар сабаб тобора камроқ сотилмоқда. Бу ҳақда ношир, “Академнашр” нашриёти раҳбари Санжар Назар UzReport TV’га берган интервьюсида айтиб ўтди.
16 сентябрь куни Тошкент вилоятида “Битмас хазина” китоб фестивали ўтказилди. Тадбир доирасида телеканал мухбири Санжар Назардан китоб савдоси қандай кетаётгани бўйича фикрларини сўраган. Ноширнинг таъкидлашича, 2020 йилдан кейин китоблар сотувида ўсиш тўхтаб қолган.
“Китоблар сотувида охирги тўрт йил давомида пасайиш бор. Ҳар йили китоб савдоси камайиб келмоқда. Бу жаҳонда кузатилаётган иқтисодий–сиёсий жараёнлар, урушлар, аҳолининг реал даромадлари камайиши ва солиқ юкининг ортиб кетгани билан боғлиқ. Ҳозир китоб соҳасини солиқлардан бутунлай озод қилиш ҳақида фикрлар янграмоқда. Агар шундай қилинса, енгиллик бўлса, савдо ҳажми ортарди деб ўйлайман”, деди ношир.
Санжар Назар мамлакатда муаллифлик ҳуқуқи таъминланмаётгани ҳам катта муаммо эканини айтди.
“Бизда ҳали муаллифлик ҳуқуқи бўйича маданият етарли даражада эмас. Ҳатто айрим нашриётлар ҳам бу ҳуқуққа умуман амал қилмасдан фаолият юритмоқда. Муаллифлик ҳуқуқи бўйича қонун ишлашини мунтазам назорат қилинмаса, соҳада қонунбузарлик учун кўриладиган чоралар муқаррарлиги таъминланмаса, аҳвол ўнгланмайди”, деди мутахассис.
Изоҳ (0)