Лавров Россия ва Украинанинг март ойидаги келишувлари АҚШ сабаб бузилганини айтди (видео)

Россия ташқи ишлар вазири Сергей Лавров март ойида Истанбулда бўлиб ўтган Россия—Украина музокараларида томонлар вазиятни «ҳал қилиш ёндашуви» бўйича келишиб олишга тайёр бўлганини айтди. Вазирнинг таъкидлашича, ўшанда Киевнинг шартлари бўйича сулҳга эришиш мумкин эди. Лавров келишувларнинг муваффақиятсизликка учрашида Буюк Британия ва АҚШни айблади.

Март ойи охирида Украина делегацияси билан музокаралар столига ўтирган эдик, ўшанда Истанбулда украиналиклар таклиф қилган тамойиллар асосида вазиятни ҳал қилиш бўйича ёндашув келишиб олинган ва ўша вазиятда булар бизга маъқул келган эди, — деди Лавров «60 дақиқа» дастури эфирида. У Украина ўшанда қандай шартларни илгари сурганига аниқлик киритмади.

Унинг ишонч билан айтишича, музокаралар «АҚШ ва Лондоннинг бевосита буйруғи билан» тўхтатилган. Сергей Лавров «бу урушни Зеленский режимини тўлиқ назорат қиладиган англо-сакслар бошқармоқда, поляклар ва Болтиқбўйидагилар эса уларга қўшилишга ҳаракат қилмоқда» деб таъкидлади.

ТИВ раҳбарининг сўзларига кўра, Россия «мулоқотга киришиш бўйича жиддий таклифлар олмаган».

Жиддий чақирувлар бўлгани йўқ, биз ҳам уларга салбий жавоб бермадик, аниқ таклифлар ишлаб чиқдик, — деди вазир тафсилотларга тўхталмасдан.

Лавровнинг айтишича, Россия «ҳеч қачон музокаралар ўтказишни сўрамаган».

Украинанинг илтимосига биноан музокараларнинг Истанбул раунди бошланганди, биз ижобий жавоб бердик. Бу жараён ташаббускорларининг ўзи океан ортидан хитобларини тўхтатди, — деб иддао қилди Россия ТИВ раҳбари.

Истанбулдаги учрашув 29 март куни бўлиб ўтган эди. Унинг якунлари бўйича Россия делегацияси раҳбари Владимир Мединский Украина «Россиянинг шу йиллардаги фундаментал талабларни бажаришга тайёрлигини эълон қилганини» айтган. Бу талаблар орасида Украинанинг НАТОга аъзо бўлишдан бош тортиши ва ҳудудига хорижий ҳарбий базаларни жойлаштирмаслиги ҳам бор эди. Шунингдек, у Киев нейтрал ва ядросиз мақомга интилаётганини тасдиқлаганини, Россия эса Украинанинг Европа Иттифоқига киришига қарши эмаслигини айтган. Аммо Кремль музокараларнинг бу раундини «ютуқ» деб ҳисобламади.

Мамлакатларнинг икки томонлама музокаралари Украина ташаббуси билан май ойида тугатилди. Сергей Лавровнинг айтишича, Ғарб Киевга музокараларни давом эттиришни тақиқлаган. 30 сентябрь куни Украина президенти Владимир Зеленский Владимир Путин билан музокара қилишдан бош тортишини маълум қилди. Зеленский, шунингдек, мамлакатнинг НАТОга тезлаштирилган асосда қўшилиши ҳақидаги аризани имзолади.