Жанубий Кореяда 26 августдан бошлаб чет элликлар учун кўчмас мулк харидида янги қоидалар кучга киради. Энди Сеул шаҳрида, шунингдек, пойтахтнинг аксарият туманларида уй-жой сотиб олиш чекланади. Бу ҳақда The Korean Herald хабар берди.
Хорижликлар уйларни маҳаллий ҳокимият рухсати билан ва шахсий яшаш учун сотиб олиши мумкин. Чеклов амал қиладиган ҳудудларга Сеул, Кёнгидо провинциясидаги 23 та муниципалитет (Янгжу, Ичон, Ижонгбу, Тондучон, Янгпён, Ёжу, Гапёнг ва Ёнгчон мустасно) ва Инчондаги еттита автоном округ (Донггу, Кангҳwа ва Онжиндан ташқари) киради.
Барча хорижий шахслар, компаниялар ва идоралар кўчмас мулк сотиб олишдан олдин ҳокимиятдан рухсат олиши шарт. Рухсатсиз битимлар ҳақиқий эмас деб ҳисобланади.
Чекловлар барча турдаги уй-жойларга тааллуқли: квартиралар, кўп қаватли уйлар, таунхауслар ва хусусий уйлар. Фақат офистеллар (бизнес-классдаги апартаментлар) бундан мустасно. Кўчмас мулк сотиб олгандан сўнг, чет эллик 4 ой ичида кўчиб ўтиши ва у ерда камида 2 йил истиқомат қилиши шарт. Шу сабабли уй сотиб олгач, уни ижарага бериб бўлмайди. Уй пулга сотиб олинса рухсат керак бўлади, бепул берилса шарт эмас.
Агар қоида бузилса, мулк жойлашган ҳудуд ҳокимияти 3 ой ичида қонунга амал қилишни буюради. Агар бу талаб бажарилмаса, ҳар йили ер нархининг 10 фоизигача жарима солинади.
Изоҳ (0)