Исроил армияси Ғазо шаҳрининг 1 миллионга яқин аҳолисини эвакуация қилиш режалари ҳақида сектордаги халқаро гуманитар ташкилотлар ва тиббиёт муассасаларини огоҳлантирди. Бу ҳақда BBC хабар берди.
Таъкидланишича, бу ҳаракат Ғазо шаҳрида ўтказилиши кутилаётган ҳарбий амалиётлар олдидан амалга оширилмоқда. Расмийлар Ғазонинг жанубидаги касалхоналар беморларни қабул қилишга тайёрланаётганини билдирган. Бироқ секторни бошқараётган ҲАМАС гуруҳига тегишли Соғлиқни сақлаш вазирлиги бу режаларни кескин танқид қилиб, бу тиббиёт тизимини бутунлай издан чиқаришини айтган.
БМТ маълумотларига кўра, Ғазодаги 36 та шифохонадан 18 таси ҳозирда қисман ишлайди. Улардан 11 таси Ғазо шаҳри губернаторлигида ва биттаси Шимолий Ғазо губернаторлигида жойлашган. Сектордаги аксарият инсонпарварлик ташкилотлари Исроилнинг бу ҳаракати катта гуманитар фалокатга олиб келишини таъкидлаб, Ғазо шаҳрида қолиб, ёрдам кўрсатишни давом эттиришини маълум қилган. Уларнинг айтишича, жанубдаги касалхоналар аллақачон ҳаддан ортиқ юклама остида ишламоқда.
Ғазо шаҳрининг шарқий ҳудудларида 21 август куни кучли бомбардимонлар бўлиб ўтгани хабар қилинган. ҲАМАСга қарашли фуқаролик мудофаа хизмати маълумотларига кўра, ушбу зарбалар оқибатида 48 киши ҳалок бўлган. Шаҳарда кўплаб дронлар ҳавода айланиб, аҳолига жанубга кўчиш ҳақида огоҳлантирмоқда. Бироқ айрим маҳаллий аҳоли вакиллари у ерларни ҳам хавфсиз деб ҳисобламайди.
“Кўпчилик шаҳардан кўчиб кетмаслик ниятида. Улар бизни ўлдирса, уйимизда ўлдира қолсин”, деди маҳаллий аҳоли вакилларидан бири.
Изоҳ (0)