Хитойда аёл қамоқ жазосидан қутулиш учун кетма-кет уч нафар фарзандни дунёга келтирди. Бу ҳақда China Morning Post хабар берди.
Чен Ҳонг тахаллуси билан танилган аёл 2020 йил декабрь ойида фирибгарликда айбланиб, беш йилга озодликдан маҳрум қилинган эди. Бироқ у панжара ортида ҳаётдан қутулишнинг йўлини топди. Қамоқхонада ўтириш ўрнига Чен мамлакат қонунчилигини ўрганиб чиқиб, озодликда қолишга муваффақ бўлди.
Хитой қонун ҳужжатларига кўра, оғир касалликка чалинганлар, ҳомиладор аёллар, янги туғилган боласи борлар ёки ўзини парвариш қила олмайдиган маҳкумлар жазони вақтинча қамоқдан ташқарида ўташларига рухсат этилади. Одатда улар уйида ёки жамоат назорати остида бўлиб, мунтазам равишда ҳуқуқ-тартибот идораларига маълумот бериб туради. Уйдан туриб жазони ўтаётганлар ҳар уч ойда ҳомиладорлик ёки касаллик ҳолати ҳақида ҳисобот топширишлари шарт.
Шу каби текширувлардан бирида, 2024 йил май ойида Ченнинг учинчи боласини ҳам дунёга келтиргани, аммо аёлнинг фарзанди билан яшамаётгани аниқланди. Бундан ташқари, у аллақачон эридан ажрашиб, икки нафар катта фарзанди отаси билан қолган эди.
Фото: BBC
Натижада маҳаллий прокуратура органлари аёл ҳомиладорликни қамоқдан қочиш воситаси сифатида ишлатганини тасдиқлади. Дастлаб аёлни қамоққа қайтариш масаласи кўриб чиқилди, бироқ жазоси якунланишига бир йилдан кам муддат қолганлиги сабабли Ченни вақтинча маҳбусларни сақлаш марказига жойлаштиришди.
Японияда эса бутунлай тескари ҳолат кузатилмоқда. Кексайган аёллар қашшоқлик ва ёлғизликдан қочиш учун қамоқхонага тушишни исташади, чунки аёллар колониясида нафақахўрларга овқат берилади, парвариш қилинади.
Изоҳ (0)