Украина урушда етарли кучга эга бўлмаган Россия устидан ғалаба қозониши мумкин. АҚШ армиясининг Европадаги собиқ қўмондони генерал Марк Хертлинг Wiener Zeitung’га берган интервьюсида бу ҳақда гапирди.
Марк Хертлинг урушда Украина армияси дуч келиши мумкин бўлган баъзи муаммолар ҳақида гапирди.
“Украина бу урушда ғалаба қозониши мумкин. Албатта, нимани ғалаба деб ҳисоблашни Украина президенти Владимир Зеленский ва украин халқи ҳал қилади. Бироқ мен ташқи кузатувчи сифатида ғалабани барча босиб олинган ҳудудлар, жумладан, Қримни қайтариб олиш, деб таърифлайман”, — деди Хертлинг.
У Россия қўшинлари сафарбар қилинганлар ҳисобига ғалаба қозониш имкониятини кучайтиришга ҳаракат қилиши, бироқ уларда янги аскарларни тайёрлаш ва жиҳозлашда муаммолар борлигини таъкидлади.
“Россия армияси аскарларини яхши тайёрламайди. Кейинги сафарбарлик тўлқинлари, албатта, жанг майдонидаги вазиятга таъсир қилиши мумкин. Миқдорнинг ўз сифати бор, деган эски ҳарбийча гап бор. Аммо Путин 300 минг кишини сафарбарликка жалб қилган тақдирда ҳам, янги аскарлар олдинги сафларда хизмат қилиш учун қандай тайёрланиши ва жиҳозланиши ҳақида савол бор. Бироқ ҳатто шундай оломонни ҳам бостириш мумкин. Буни охирги марта Бахмут ва Соледар учун бўлган жангларда кўрганмиз”, — деди у.
Америкалик генерал рус аскар ва зобитлари шиддатли жангга етарлича тайёрланмаган ва стратегик мақсадларга эриша олмаган, деб ҳисоблайди.
“Тинчлик даврида Россиянинг кўплаб манёвр ва машқларида бўлганман, аскарлар юқори интенсивликда Россия армияси иштирокидаги кучли тўқнашувга тайёр эмас. Россияликлар билан АҚШнинг Европадаги армиясининг бош қўмондони сифатида улардан олган энг яхши тажрибам раҳбарлик маданиятига тааллуқлидир. Россия армиясининг ташкил этилиши, генераллардан тортиб офицерлар ва оддий аскарларга қадар, мураккаб қўшма қуролли жангларни ўтказиш ва тактик даражада ҳаракат қилишга қодир эмас”, — деди генерал.
Шу билан бирга, Украина армияси ҳам муаммоларга дуч келади. Улар орасида Хертлинг “деярли узлуксиз ўлдиришга мажбур бўлган” аскарларнинг чарчоқларини алоҳида таъкидлади. Украина бу бўлинмаларга юкланган вазифани ва жанговар миссиялар сонини камайтира олмайди.
“Иккинчи жаҳон урушидан бери биз аскарлардаги руҳий ва жисмоний зўриқишнинг бундай уйғунлигини кўрмаганмиз. Россия томонида армияни кучайтириш учун кўплаб сафарбар қилинганлар бор. Украина учун нафақат ўз қўшинларини тайёрлаш, балки бир вақтнинг ўзида аскарларга таниш бўлмаган кўплаб янги қурол тизимларини ўрганиш ҳам қийин бўлади. Аммо яхши хабар шундаки, Украина армияси бу борада жуда қобилиятли эканини исботлади”, — деди у.
Генерал яқин ойлардаги воқеалар ривожи ҳақида гапирар экан, Украина қўшинлари жануби-шарқдаги ҳудудларни, хусусан, Донбассдаги ҳудудларни қайтариб олишга, Қримдан русларнинг логистика йўлларини тўсиб қўйишга ҳаракат қилишини айтди.
“Ўйлайманки, жануби-шарқда ҳужум операцияларини ва Донбассда ҳудудни қайтариб олиш учун кичикроқ тактик тўқнашувларни кўрамиз. Лекин асосий ҳаракат Қримдан келаётган Россия логистика оқимини тўсишга қаратилган бўлади”, — деди Хертлинг.
Мавзуга доир: Зеленский офиси Россия билан урушни тугатиш сценарийсини маълум қилди
Изоҳ (0)