20th Century Studios кинокомпанияси машҳур “Қаттиққўл хоним” фильмининг давомини суратга олишни бошлади, деб хабар берди PeopleTalk.
Сиквелда “Қаттиққўл хоним”нинг барча юлдузлари — Мерил Стрип, Энн Ҳетеуэй, Эмили Блант ва Стенли Туччилар суратга тушади.
Актёрлар таркибига, шунингдек, “Шарқий экспрессдаги қотиллик” фильмидаги образи билан танилган Кеннет Брана ҳам қўшилди, у мода журналининг қатъий ва харизматик муҳаррири Миранда Пристлининг турмуш ўртоғи ролини ўйнайди.
Студиянинг Instagramʼдаги расмий аккаунтида “Қаттиққўл хоним 2 ҳозир ишлаб чиқарилмоқда”. сарлавҳали видео эълон қилинди. Ушбу пост остига фильм мухлислари унинг давомини интизорлик билан кутаётганини ёзиб қолдирган.
Биринчи фильмнинг сценарий муаллифи Алин Брош МакКенна “Форрест Гамп” фильмининг “Оскар” мукофотига сазовор бўлган продюсери Венди Файнерманга қўшимча равишда асл фильм режиссёри Девид Фрэнкэл билан бирга фильмнинг давомини суратга олиш учун иш бошлади.
Deadline нашрининг ёзишича, фильмнинг давоми 2026 йил 1 майда чиқади. Фильмда қаҳрамон Миранда Пристли (Мерил Стрип) муваффақиятли реклама компаниясини бошқараётган собиқ ёрдамчиси Эмилидан ёрдам сўрайди.
Фильмнинг биринчи қисми танқидчиларнинг олқишига сазовор бўлган эди. Мерил Стрипнинг ижроси алоҳида эътироф этилди ва кўплаб мукофотларга сазовор бўлди. Энн Ҳетеуэй ва Эмили Блант ҳам мухлислар эътирофига сазовор бўлди ва бир қатор номинацияларга лойиқ деб топилди. 41 миллион долларлик бюджет билан фильм бутун дунё бўйлаб 326 миллиондан ортиқ маблағ тўплаган ва 2006 йилнинг энг юқори даромад келтирган 12 та фильми қаторига кирди.
Изоҳ (0)