«Роли учун ёши катталик қилади» деган гапни 30 ёшли актрисалар биз ўйлагандан ҳам кўп эшитган. Бундан ташқари, тескари ҳолат ҳам бор — айрим актрисалар эса жиддий роллар учун ёши кичиклик қилади.
Женна Ортега
«Уэнздей» сериали премьерасидан сўнг 20 ёшли бош рол ижрочиси ҳақиқий юлдузга айланди. Аммо яқинда актриса актрисаликни ташлаш ҳақида ўйлаётганини маълум қилди. Женнанинг сўзларига кўра, у болалар роллари учун жуда катта, жиддий роллар учун эса ҳали жуда ёшлик қилади.
Яна бир муаммо — Disney билан узоқ даврлик ҳамкорлик эди. Женна Disney ролларида қолиб кетмаслигини ҳаммага исботлаши керак эди — «Қичқириқ» ва «Х» қўрқинчли фильмларида ўйнаб, буни ҳам уддалади.
Энн Хетеуэй
Энн Хетеуэй ўзининг 30 ёшини нишонлаганидан сўнг, у кинода ишлашнинг қийинчиликлари ҳақида гапириб берди. Гап шундаки, бир вақтлар унинг ёшига мўлжалланган роллар 20 ёшли актрисаларга берилган.
«20 ёшимда, ростини айтсам, 50 ёшдан ошган аёллар ролини беришарди. Ҳозир эса 30 ёшдаман, аммо менга мос ролларни 24 ёшли актрисалар ўйнаяпти», — дейди у.
Женнифер Лоуренс
Женнифер Лоуренс «Ҳаёт-мамот ўйинлари» фильмидаги Катнисс Эвердин роли учун кастингдан ўтганида, ундан биринчи бўлиб қанча вазн йўқотиши ҳақида сўрашган. Бироқ актриса озишдан қатъиян бош тортади.
Яхшиямки стандартлар аста-секин ўзгариб бормоқда. «Ҳаёт-мамот ўйинлари» фильмида ишлаганимни жуда яхши эслайман, ҳеч ким жангари фильмдаги бош ролни аёл кишига бермасди. Улар бу эркаклар аудиториясини жалб қилмайди, дейишарди. Ва ҳар сафар бундай қолиплардан бирини бузадиган янги фильмни кўрганимда, ўзимни бахтиёр ҳис қиламан».
Ана де Армас
«Қинидан чиққан пичоқлар» комедик детективида рол ўйнаганидан бери Ана де Армаснинг карьераси кўтарилиб кетди. Бироқ дастлаб актриса Марта Кабрера ролини рад этмоқчи бўлган.
Гап шундаки, Ана асли кубалик. Сценарий билан танишиш чоғида дастлаб унга Марта яна бир «Лотин америкалик гўзал ҳамшира» бўлиб туюлади. Актрисага бу ёқмайди, чунки унинг сўзларига кўра, испан қаҳрамонлари кўпинча гўзалликдан бошқа нарса сифатида тасвирланмаган. Яхшиямки, Ана охир-оқибат фикрини ўзгартиради.
Зои Салдана
Зои Салдана жамиятнинг аёлларга бўлган босимидан ташвишланади. Актрисанинг сўзларига кўра, аёл фарзандли бўлиши ва 40 ёшга тўлиши биланоқ уни кекса деб ҳисоблашади.
«Мен 44 ёшдаман, эндигина ёшим ва ҳаётимни назорат қилиб олдим. Аёлларни ҳурмат қиладиган режиссёр ва продюсерлар билан ишлай олишимдан жуда хурсандман».
Эмильи Блант
Эмили Блант «Қаттиққўл хоним» фильмидаги машҳур ролига дарҳол тасдиқланмайди — у кастингдан ўта олмайди ҳам: режиссёр Эмили етарлича замонавий эмаслигини таъкидлайди. Гап шундаки, актриса парвозга кечикаётганди: у спорт кийимида бўлган, мода журнали ходими сифатида кўринишга тайёр эмасди.
Охир-оқибат фильм режиссёри унга шундай дейди: «Майли, сизни яна синаб кўрамиз, лекин илтимос, спорт кийимидан бошқа нарсада келинг! Сиз замонавий кўринишингиз керак — қаҳрамонга кўпроқ ўхшаш лозим. Иккинчи кастингдан сўнггина актриса барча шартларни бажариб бўлгач, унга рол таклиф қилинади. Айтганча, Эмили айнан шу фильмдан сўнг унинг модага бўлган муҳаббати сезиларли даражада ошганини тан олади.
Марго Робби
Режиссёр ва актёрлар иштирокидаги «Бир пайтлар Голливудда» фильмининг матбуот анжуманида журналист нега бу фильмда Марго Роббининг қаҳрамони деярли ҳеч нарса демаганини сўрайди. Кейинчалик ижтимоий тармоқларда фойдаланувчилар Роббини истеъдодли актриса деб айтишади, аммо негадир унинг иштирокидаги суҳбатлар сони камлигини таъкидлашади.
Режиссёр Квентин Тарантино «Бир пайтлар Голливудда» фильмининг бош қаҳрамони Леонардо Ди Каприо ижро этган Рик Далтон эканлигини тушунтиради. Шунга асосан сюжет унинг атрофида айланади. Аммо фильмнинг кенгайтирилган версиясида Роббини кўпроқ гапиртиришга ваъда беради.
Мавзуга доир:
Изоҳ (0)